...Хас биирдии киһи орто дойдуга ананан түспүтэ, кинини арыаллаан, куйаарга туспа планета төрөөбүтэ, халлааҥҥа сулус суһумнаабыта- кистэлэҥ күүс…
Мандар
Муус устар 11 күнүгэр «Ситим» КК «Афган Баанньа» диэн ааттанан кинигэ сүрэхтэннэ. Кинигэ Афганистан сэриитин кыттыылааҕа, «Бойобуой үтүөлэрин иһин» мэтээл хаһаайына, Хоточчу хоһуун уолун Иван Павлович Федоров туһунан. Бу киэһэ кини Ис дьыала сотруднига, дьиэ тутааччы, тустуук, ат сүүрдээччи, хапсаҕайдьыт, бастыҥ доҕор, тапталлаах кэргэн, аҕа, эһээ буоларын дойдутун дьонун- сэргэтин кэпсэээнэ туоһулаата. Кинигэ Иван Федоров таптал ааттарынан таҥыллыбыт: “Банньикоп” диэн түһүмэххэ – оҕо сааһа ойууламмыт, чугас дьонун ахтыыта киллэриллибит. “Баанньа- үчүгэй уол” дэнэн Ой орто оскуолатыгар, Смоленскай куорат физкультурнай институтугар үөрэммит кэмэ, ити кэминээҕи таптыыр дьарыга арыллыбыт. “Афган Бааанньа” түһүмэҕэр кэргэнэ кэпсээбитигэр олоҕуран кылгас кэпсээн уонна афганец табаарыстарын ахтыылара киирбит. “Бойкуот” диэн дьикти ааттаах түһүмэххэ Баанньа бу таптал аата хайдах күөрэйбитин туһунан арыйан баран студенческай табаарыстарын ахтыылара, милиция доҕотторо, кэлин тренер быһыытынан туох хайдах үлэлээбитин билэр дьоно ахтан суруйбуттар. «Биһиги аҕабыт» диэн түмүктүүр түһүмэҕи кэргэнэ, оҕолоро ахтан олус иһирэхтик суруйбуттар уонна хаартыскалар киирбиттэр. Кинигэ сүрэхтэниитэ бэрт истиҥ эйгэҕэ ааста. Иван Федоров төрөөбүт дойдутуттан- Эдуард Варламов, Иннокентий Федоров, Дмитрий Матвеев, үөрэммит оскуолатыттан- Саргылана Константинова, Альберт Гермогенов, Алексей Уаров, Николай Иванов, бэл диэтэр институтуттан – «атах-тобук тостор» хаһан да арахсыбатах доҕотторо- Вячеслав Семенов, Сергей Габышев дьиэ кэргэнинээн, Дьокуускай 6 ГОМтан – Константин Филиппов кэлэн кинигэ сүрэхтэниитигэр кыттыстылар, билбэтэх- истибэтэх сонуннарбытын кэпсээтилэр, баҕар иккис кинигэ эмиэ баар буолсу ду диэн сэмэй санааны үөскэттилэр. Иван Федоров оҕолоро бу киэһэ аҕаларын олус истиҥник аҕыннылар, ыллаан, остуол тардан кэлбит ыалдьыттарын маанылаатылар, хас биирдиилэригэр кинигэ бэлэхтээн атаардылар.
Ити курдук дойду патриота, Афганистан бэтэрээнэ, спортсмен, кэргэн, аҕа Иван Федоров туһунан оҕону иитиигэ- такайыыга туһаайыллыбыт биир бастыҥ кинигэ таҕыста. Суруллубут суоруллубат.
Кэргэним, аҕабыт туһунан толору арыйар ахтыыны суруйбут, кини туһунан кэрэ өйдөбүлү күөдьүтэр дьоммутугар- сэргэбитигэр махтанабыт.
Саргылана Федорова, Иван Федоров кэргэнэ
А.М. Сидорова аатынан «Ситим» КК дириэктэрэ
