Туллук курдук туотаһыйбыт, чыычаах курдук чубугураабыт эмдэй- сэмдэй оҕолордоох «Туллукчаан» оҕо саадыгар Саха Өрөспүүбүлүкэтин  уонна Эйэ, Үлэ, Маай күннэрин көрсө » Саха оҕотобун» диэн ааттаах тэрээһини ыыттыбыт. Тэрээһини модельнай библиотека үлэһиттэрэ Ньургуйаана Руслановна Лебедева, Галина Прокопьевна Скрябина Олоҥхо дойдутун туһунан кэпсээнтэн саҕалаатылар. Бииртэн биир кэрэ хартыыналарынан доҕуһуоллатан, саха тылынан уус-уран айымньытын чыпчаалын- олоҥхотун геройдарын, сирин -дойдутун туһунан сэһэргээн кыра дьон болҕомтотун туттулар. Төрүт тыас-уус туһунан «Ситим» култуура киинин дириэктэрэ Саргылана Федорова кэпсээн аччыгый сэҥээрээччилэр ытыстарын  тыаһын ылла. Сиксиккэ, дьаҕаҕа, кырыымпаҕа оонньоон иһитиннэрдэ. «Уусхомусфест» бырайыакка Александр Данилов оҥорбут хомуһун кэпсээтэ, тардан көрдөрдө. Түмүккэ Ньургуйаана Лебедева «Оһуор» үҥкүүтүнэн флешмоб туруорда. Кэнчээри ыччаппыт омугунан киэн тутта улааттын. Саха буолан сандаардын, киһи буолан килбэйдин!

ТӨРӨӨБҮТ ТӨРҮТ СИРБИТ- САХАБЫТ СИРЭ ЧЭЛГИЙЭ САЙЫННЫН! ЧЭЧИРИИ ТУРДУН!