Үгэскэ кубулуйбут, Самыртай сыһыытын культуратын үлэһиттэрин «БАРЫ БИИРГЭ» сомоҕо кэнсиэрин тиһигин быспакка сыл ахсын ыаллыы сытар нэһилиэктэргэ гастроллуу айанныыбыт. Бу үтүө үгэһи өр сылларга «Ситим» КК директорынан үлэлээбит Новгородова Надежда Николаевна саҕалаан күн бүгүнүгэр диэри биһиги илдьэ сылдьабыт, олус диэн күүтэр тэрээһиммит.
Самыртай сыһыытыгар
Хоточчу, 1-Дьөппөн (Тит-Эбэ), 2-Дьөппөн (Күөрдэм), Кыһыл Үрүйэ, Хачыкаат нэһилиэктэрэ киирэллэр. Ол курдук сэтинньи 3 күнүгэр Хоточчу, Тиит-Эбэ, сэтинньи 4 күнүгэр Кыһыл-Үрүйэ, Хачыкаат нэһилиэктэригэр,сэтинньи 5 күнүгэр Күөрдэмҥэ кэнсиэртээтибит. Сыл ахсын саҥа ырыалар, үҥкүүлэр,саҥа ааттар, эдэр специалистар саҥалыы тыыннаан кэнсиэрпит бэрт сэргэхтик ааһар. Ону сэргэ Р.К.Захаров аат.“Самыртай” МК “Музей в чемодане” сонун быыстапкатын туруоран, дьон-сэргэ сэҥээрэ көрдүлэр-иһиттилэр. Концерт саҕаланыыта уонна бүтүүтэ эбээһинэстээх гимн буолбут ырыаларбытын сыллата ыллыыбыт. Алексей Третьяков тыл. Михаил Атласов мелодиятыгар Самыртай сыһыытын култууратын үлэһиттэрин “Өрөгөй ырыата” уонна биир дойдулаахпыт Галина Иванова- Айтыына Уран, Лидия Харитонова тылларыгар, Александр Уваровский мелодиятыгар “Үтүөҕэ-кэрэҕэ угуйар аналлаах” Хаҥалас улууһун култууратын үлэһиттэрин өрөгөй ырыатынан үөрэн-көтөн туран түмүктүүбүт.
Майя Свинобоева)