Тэрээһин дьиэ кэргэн, түөлбэ , нэһилиэк иһинэн хамаанданан үлэни көҕүлүүр, үүнэр көлүөнэ ыччаты патриотическай тыыҥҥа иитэр сыаллаах. Күрэҕи Иван Павлович Федоров дьиэ кэргэнэ , табаарыстара үбүлээн ыыттылар. Сүрүн судьуйа Петр Афанасьевич Лебедев, судьуйа көмөлөһөөччүтэ Олег Владимирович Артамонов алта түһүмэхтээх күрэҕи олус тэрээһиннээхтик ыыттылар. Ийэлэргэ хомуур күрэҕэр Анна Киприянова, аҕаларга сыал ытыыга Семен Платонов, оҕолорго хабылыкка Борисова Юлия, автоматы ыһыыга хомуйууга Антон Ефимов, военизированнай эстафетаҕа «Эрчим» түөлбэ, дартска «Аргыс» түөлбэ кыайан, түмүккэ «Эрчим»түөлбэ бастаан таҕыста. Күрэххэ кыттыбыт түөлбэлэргэ Федоровтар дьиэ кэргэттэрэ анал бириистэри, мэтээллэри туттардылар. Анал бириистэри Иван Федоров Смоленскайдааҕы институтка бииргэ үөрэммит табаарыстара тустууга спорт маастардара Вячеслав Семенов, Сергей Габышев Анжелика, Александр Алексеевтар дьиэ кэргэттэригэр, автоматы ыһыыга үчүгэй көрдөрүүлээх Антон Ефимовка туттардылар. Ону таһынан Туяра Кузьмина кыайыыга дьулуурдаах үөрэнээччигэ анал бириис, Павел Федоров бииргэ үөрэммиттэрэ түөлбэ салайааччыларыгар анал бириистэри туттартаатылар. Күрэх биир тыынынан олус тэрээһиннээхтик ааста. Түөлбэ ыытар тэрээһинэ саҕаланна, онон бииртэн биир интэриэһинэй тэрээһиннэр буола туруохтара диэн эрэнэбит. «Ситим» КК дириэктэрэ Федорова С.С.