Ыам ыйын 23 күнүгэр 2 Дьөппөн нэһилиэгин «Туллукчаан» оҕо уһуйааныгар «Ситим» КК үлэһиттэрэ уонна олохтоох оскуола үөрэнээччилэрэ, учууталлара кыттыһан Оһуохай күнүн ыыттыбыт. Кырачаан оҕолорбут хата оһуохай оонньуутун бэркэ билэллэриттэн үөрдүбүт. Бу күн бэһис кылаас үөрэнээччилэрэ, салайааччылара Варвара Романовна Павлова, Ситим киинин дириэктэрэ Саргылана Федорова оҕолорго аналлаах оһуохай таһааран биир эргииргэ түмүстүбүт. Сахалыы тыыммытын сөргүтэн, илии илииттэн, тоҥолох тоҥолохтон тутуһан Эллэй эһэбит этэн- тыынан хаалларбыт оһуохайын оройуттан туттубут. Оҕолорбут сэргэхтэрэ, таҥастар- саптара толорута, тыллара чуолкайа, оһуохайдыыр баҕалаахтара баарыттан тэрийээччилэр үөрдүбүт.
Төрүт үҥкүүбүт утумнанан- ситимнэнэн салҕана туруохтун, уһун тыыннаах , уран тыллаах оһуохайдьыттар үүнэ- тэнийэ турдуннар. Саханы сомоҕолуур күүстээх, доруобуйатын тупсарар эйгэлээх, айылҕалыын ситимниир үтүө үгэстээх үҥкүүбүт дьиэрэйэ туруохтун!

Саргылана Федорова