Самаан сайын сатыылаабыт, кэҕэ кыыл чоргуйбут, күөх мутукча сытынан тунуйбут кэрэ күҥҥэ 2 –Дьөппөн култууратын үлэһиттэрэ «Ньукуолун бэлэҕэ» диэн ааттаан бар дьоммутугар кэрэ түгэни бэлэхтээтибит. Бу күн кус хомуйуутүн акцията түмүктэнэн, булчут дьоммут 90 куһу утары ууннулар. Ытык кырдьаҕастарбытыгар уонна анал байыаннай операцияҕа сылдьар уолаттарбыт дьиэ кэргэттэригэр доруобуйаны, дьолу – соргуну, уолаттарбытыгар этэҥҥэ эргиллэн кэлэллэригэр үрдүкү күүстэртэн көрдөһөн -күүһү, дьулууру, сэрэҕи баҕаран туран кустарбытын бу дьоро киэһэ түҥэттибит.
Дьиэ кэргэн күнүгэр анаан ыытыллыбыт хаартыска күрэҕин кыттыылаахтара- Александровтар, икки Прокопьевтар, Константиновтар, Скрябиннар, Платоновтар, Федоровтар- Кириллиннэр дьиэ кэргэттэрэ уонна викторина кыайыылаахтара 1 миэстэ-Львова Айталина Алексеевна, 2 миэстэ- Попов Михаил Филиппович, 3 миэстэ — Скрябина Анна Егоровна “Күөртээх Күөрдэмнэр” бырайыак чэрчитинэн оҥоһуллубут остуол оонньууларынан бэлиэтэннилэр. Дьэ ити курдук төгүрүччү бэлэх бэрсиһиинэн саҕаланан дьоро киэһэбит биир тыынынан барда.
Манна култуура үлэһиттэрин иллэҥ кэмҥэ дьарыктара «Кэрэттэн кэрэ саҕыллар» диэн быыстапкаҕа көһүннэ. Үлэһиттэрбит кыбытык, баайыы, араас киэргэл-оҥоһук, дьөһөгөй оҕотун хаартыскаҕа түһэриилэрэ, хоһооннор хомуурунньуктара тилэри ууруллубуттар. Көрөөччү болҕомтотун тарта.
Дьоро киэһэ оонньуута суох табыллыбат. Бу күн көхтөөх дьоммут оонньууга кыттан култуура үлэһиттэрэ туруорбут бэлэхтэрин -планетарнай миксер, массыына универсальнай флешката, колонка, биэс улуустан хомуллубут отон араас көрүҥүттэн барыанньа набора, байанай бэлэҕэ, ону тэҥэ уран тарбахтаах Олеся Александрова тикпит хаппарын бэлэх ылан үөрдүлэр –көттүлэр.
Уот ситимэ да алдьаннар, эҕэрдэ кэнсиэр онтон тутулуктаммакка барда. Бииртэн биир кэрэ куолас кыргыттар, үҥкүүһүт далбар хотуттар сценкалаан ыла- ыла, сонунтан сонуну бэлэхтээн ытыс тыаһа хабыллан олордо. Үҥкүүлэри методист Майя Скрябина, ырыалары Майя Свинобоева, сценкалары Саргылана Федорова туруордулар.
“Ньукуолун бэлэҕэ” тэрээһиммит ыытылларыгар көмөлөспүт дьоммутугар- сэргэбитигэр, култуура ыытар тэрээһиннэригэр көхтөөхтүк кыттаааччыларбытыгар уонна истиҥ истээччилэрбитигэр, сэргэх сэҥээрээччилэрбитигэр барҕа махтал буолуохтун.
Уостубат уйгулаах, быстыбат быйаҥнаах самаан сайын буоллун, өлгөм үүнүүлээх, үүт – сүөгэй олбохтоох үтүө кэммит үүммүтүнэн!
“Ситим” КК дириэктэрэ С.С. Федорова