Муус устар 7 күнүгэр 2 Дьөппөн нэһилиэгэр үөрүүлээх- долгутуулаах тэрээһин буолан ааста. «Ситим» Култуура киинигэр Саха АССР культуратын үтүөлээх үлэһитэ, 2 Дьөппөн нэһилиэгин уонна Хаҥалас улууһун бочуоттаах олохтооҕо, үлэ, тыыл, култуура бэтэрээнэ, киэн туттар киһибит Акулина Михайловна Сидорова аата иҥэрилиннэ. Анал бэлиэ суругу Акулина Михайловна Сидорова төрөппүт уола Руслан Семенович Платонов, култуура бэтэрээнэ, “СР уус-уран айымньыта сайдыытыгар кылаатын иһин” бэлиэ хаһаайына Дария Семеновна Киприянова, “Ситим” КК дириэктэрэ Саргылана Семеновна Федорова арыйдылар. Бу кэннэ үөрүүлээх тэрээһиҥэ нэһилиэк олохтоохторо, ыҥырыылаах ыалдьыттар кыттан дьоро күн салҕанна.
Орто оскуола үөрэнээччилэрэ Диана Захарова «Аан Алахчын хотун» олоҥхотуттан, 6 кылаас үөрэнээччилэрин фольклорнай бөлөҕө С.Васильев- Борогонскай «Эрчимэн Бэргэн» олоҥхотуттан быһа тардан иһитиннэрдилэр. Тыйаатыр режиссера Олеся Викторовна Александрова кэрэ куолаһынан «Туйаарыма Куо» тойугун толорон киэргэттэ. Ыҥырыылаах ыалдьыттар Акулина Михайловна олорон ааспыт олоҕун, үлэтин- хамнаһын туһунан сырдаттылар. Петр Петрович Архипов, өр сылларга Хаҥалас улууһун култууратын дьаһалтатын салайааччыта, Василиса Егоровна Романова СР култууратын үтүөлээх үлэһитэ, “Россия култууратын уус- уран самодеятельноһыгар ситиһиилэрин иһин” бэлиэ хаһаайына Акулина Сидорованы кытта алтыһан ааспыт кэмнэрин ахтан- санаан аастылар.
Хаҥалас улууһун култууратын уонна духуобунай сайдыытын дьаһалтатын специалиһа, СР култууратын туйгуна Надежда Валерьевна Степанова нэһилиэк олоҕор көхтөөхтүк кыттар дьоммутун- Л.Я. Гермогенова аатынан тыйаатыр артыыстарын, «Күрүлгэн»эдэр ыччат бөлөҕүн үҥкүүһүттэрин махтал суруктарынан, бочуоттаах грамоталарынан бэлиэтээтэ. Үөрүүлээх быһыыга- майгыга олохтоох тыйаатыр артыыстарыгар Валерий Гаврильевич Говоровка, Кыах Сайан Тупсуун уолугар уонна «Ситим» КК методиһыгар Майя Николаевна Скрябинаҕа “СР уус-уран айымньыта сайдыытыгар кылаатын иһин” бэлиэлэри туттарда.
Ол кэннэ Акулина Михайловна Сидорова аатынан «Көтөр көмүс кылыһах» олоҥхо ырыатын- тойугун аһаҕас көрүү күрэҕэ ыытылынна. Күрэххэ Дария Захарова «Төхтүр» нэһилиэгин култууратын киинин методиһа уонна 2 -Дьөппөн орто оскуолатын 11 кылааһын үөрэнээччитэ Анжелика Ефимова (сал Иванова Г.И) Гран При хаһаайыттара буоллулар, ону тэҥэ Ой нэһилиэгин «Тирэх» фольклорнай бөлөҕө 1 миэстэни ылан Акулина Михайловна Сидорова оҕолоро олохтообут харчынан бириистэринэн бэлиэтэннилэр.
Ити курдук Акулина Михайловна Сидорова аатынан ааттаммыт «Ситим” Култуура киинэ саха үтүө үгэһин, ырыатын-тойугун, үйэлэри уҥуордаабыт уһун тыыннаах олоҥхотун өрө уппутунан сайдар суолу солоон таһаарыылаах ситимнээх үлэнэн киэркэйэ, аатын ааттата турдун.
