Тохсунньу 14 күнүгэр Эргэ Саҥа дьылынан Күөрдэм олохтоохторугар, ыалдьыттарыгар анаабыт Хаҥалас улууһун ырыа айааччыларын «Саҥа сыл алыптаах киэһэтэ» диэн ырыа, үҥкүү, оонньуу сынньалаҥ эҕэрдэ киэһэлэрэ бэрт сэргэхтик ыытылынна.
Бу киэһэ «Арчы» улуустааҕы норуот уус-уран айымньытын киинин методиһа М.Е. …………. СӨ ырыа айааччыларын сойууһун удастабырыанньатын үгүс ырыа ааптардарыгар Андриан Егоровка (Бокуруопскай), Галина Иванова-Айтыына Ураҥҥа (Күөрдэм) туттарда.
Маны таһынан үөрүүлээх быһыыга-майгыга Хаҥалас улууһун ырыа айааччыларын «Тускул» айар түмсүүтүн анал үрүҥ көмүс түөскэ кэтиллэр бэлиэтин уонна удастабырыанньатын туттарыы буолла. Бэлиэни Любовь Варламова (Хоточчу), Ананий Арылахов- Арылхан (Бокуруопскай), Мария Нератова (Мохсоҕоллоох), Галина Иванова-Айтыына Уран, Валерий Кузьмин (Күөрдэм) кэтэн үөрүүлэрэ үксээтэ.
Киэһэни иилээн-саҕалаан, этэн-тыынан, ыллаан-туойан Мария Нератова ыытта. Көрөөччү сэргэхсийэрин курдук бииртэн биир араас тэтимнээх сонун, саҥа ырыаларын ааптардар толордулар. Доллоһутар дьоһун- мааны куолаһынан ырыа айааччы Пелагея Семенова (Нөмүгү) кэнсиэри арыйда, ытыс тыаһын өлгөмүн хомуйда. Сыыйыллар матыыптаах саҥа дьыллааҕы вальс ырыата пааралары эргитэ, долгута тэлээртэ. Түргэн тэтимнээх ырыалар көрөөччү көҕүн тардан, кэлбит эрэ киһини үҥкүүгэ тартылар. Байаан алыптаах тыаһа- көрөөччүгэ туохтан да ахтылҕаннаах буолла. Үгүс биһирэнэр ырыалардаах Валерий Варфаломеев көрөөччү көрдөһүүтүнэн хас да ырыаны салгыппакка толордо.
Ырыа, үҥкүү быыһыгар көрөөччүлэргэ анаан оонньуулар ыытылыннылар. Кыттыбыт дьон ырыа айааччылартан анаммыт араас кэрэ бириистэргэ тиксэн үөрүүлэрэ үтүмэн.
Дьэ, бу курдук көхтөөхтүк Күөрдэммитигэр «Саҥа сыл алыптаах киэһэтэ» ааста. Улууспут үтүө-мааны айар куттаах дьонугар, ырыа айааччыларбытыгар барҕа махталбытын тиэрдэн туран, айыҥ-тутуҥ, талба талааҥҥыт сайда турдун диэн алгыспытын аныыбыт!
Күндү көрөөччүлэрбит, Күөрдэм үтүө-мааны дьоно-сэргэтэ, бу киэһэҕэ Тиит-Эбэттэн, Мохсоҕоллоохтон кэлэн көх-нэм буолбут ыалдьыттарбыт, эһиэхэ туох баар кэрэни, сырдыгы баҕарабыт, дьиэ кэргэҥҥитигэр истиҥ сыһыаны, ыраас күннээх халлааны!
Махтанабыт, тэрээһиҥҥэ күүс-көмө буолбут улуустааҕы «Арчы» норуот айымньытын киинин, Күөрдэмнээҕи А.М. Сидорова аатынан «Ситим» КК үлэһиттэригэр.

Айтыына Уран, тохсунньу 18 күнэ, 2024 с.