Киһи эрэ барыта кэтэһэр көмүс күһүнэ кэһиитин утары ууммутунан тиийэн кэллэ. Уйгу – быйаҥ олбохтоох айылҕабыт барахсан отонунан үтүө үлэһит дьонун маанылыыр, күндүлүүр. Отоннообут киһи сайын үтүөтүн кыһыны быһа саныыр, астынан – астына үүттээх чээй иһэригэр отонун мааны ас оҥорон остуолун толорор. Эһиил отоммун өссө элбэҕи үргүөм, дьоннорбун, оҕолорбун күндүлүөм диэн манньыйа – астына былааннанар. Оттон биһиги, бу куннэргэ отоннуурбут, сир астыырбыт быыһыгар сахалыы ырыанан- тойугунан толоруллубут оҥоойуктаах кэһии туттубут!
Ол курдук саха сиригэр биллибит маастардар кэлэн үтүөкэннээх маастар кылаастары тэрийдилэр, ырыаһыттар ырыа түһүлгэтин тэниттилэр.
Массаж туһатын анал идэлээх Елена Евсеева кэпсээтэ,дьоҥҥо- сэргэҕэ оҥорон көрдөрдө. Логопед Ньургуйаана Николаевна Мун олус туһалаах, наадалаах сүбэлэрин эдэр төрөппүттэр сурукка тистилэр. Киһи эрэ харчылаах, кыахтаах буолуон баҕарар онон Константин Чичигинаров урбаан эйгэтин сэһэргээһинин болҕомтолоохтук иһиттилэр. Хомус аптаах дьүрүскэнин Айсен Дьоллоохоп ыллатта,бэйэтин репертуарыттан билиһиннэрдэ, кистэлэҥнэрин кэпсээтэ. Аныгы тэрилтэлэр Граны сүрдээҕин интэриэһиргииллэр, ресурснай киин толорооччу дириэктэрэ Александра Иннокентьевна Гурьева Грант суруйуутугар араас ньымалары билиһиннэрдэ. Граннары суруйууга көдьүүстээх сүбэлэри биэрдэ. Иирэ талах туһата олус элбэх Саха сиригэр биллэр маастар Александр Апросимов талаҕы имигэстик имитэн араас кэрэ бэйэлээх оҥоһуктарын көрдөрдө, албастарын арыйда. Кыл кырдьык да бэйэтэ ырыалаах, кырыымпа доҕуһуоллаах, кэрэ тойуктаах. Маастар Изабелла Фомина кылы сатаан ыллатар, кыллыын тэҥҥэ кэпсэтэр республикаҕа биллэр маастар. Бу отонфестка бэйэтин албастарын, ньымаларын арыйда. Дьону –сэргэни үөрэттэ. Үгүспүтүн үөрэппит- сүбэлээбит педагог, уйулҕаһыт, билим кандидата, чэбдигирии тренерэ Александра Егоровна Ушницкая куруук саҥа көрүүлээх, сонунтан сонун идеялардаах. Бу күҥҥэ Александра Егоровна хамсаныы, тыыныы, салгыҥҥа хаамыы албастарын арыйда, үгүһү сүбэлээтэ. Маастар кылааска сылдьыбыт дьон сүрдээҕин астынан,элбэҕи да билбэппитин арыйдыбыт диэн дуоһуйан, инникитин бу сүбэлэри сыыска- буорга түһэрбэккэ туһаныахпыт диэн тарҕастылар. Маастардар хаарыаннаахай көмүс күннэрин бар дьону чэгиэн- чэбдик оҥорорго, үтүөнү- сырдыгы түстүүргэ аныыллар. Күөрдэм олохтоохторо кинилэри өйөөн отон, хаптаҕас кэһиилээн ыыттылар. Отонфест ыҥырыытын ылынан кэлбиттэригэр барҕа махталларын биллэрдилэр.
Онтон салгыы «Oton fest» ырыатынан- тойугунан толооммутун толордо. Саха эстрадатын сулустара, эдэр кэскиллээх ырыаһыттар бииртэн биир кэрэ, бииртэн биир чаҕылхай ырыаларынан сүрэхпитин сылаанньыттылар, харахпытын сымнаттылар. Айыллаана Сандаар,ырыаһыт кыргыттар Ay-en бөлөхтөрө, Имана, Розанна Зыкова, көмүс куоластаах Лукачевскайдар дьиэ кэргэттэрэ, эстрадабыт сулуһа Милена Борисова, Арчылаана, Кирилл Матвеев, Айса, хомусчут Айсен Дьоллоохоп матыыптарыгар уйдаран оһуокайдаан- үҥкүүлээн ыллыбыт, күөх халлааҥҥа кыырайа көтөн тахсан көмүс долгураҥҥа уйдардыбыт, уу нууралга куустаран уһуннубут.
“Отонфест” -уоспутугар отон амтана, сүрэхпитигэр ырыа сылааһа, ытыспытыгар бар дьон махтала! Үчүгэйин эбитин! Саха өһүн хоһооно- отонноотоххо оҥоойук туолар. Баҕабыт хоту сүбэ- ньыма бөҕө ылан, ырыа- тойук бөҕө истэн сүрдээҕин астынныбыт. «Отонфест» кыттыылаахтарыгар бар5а махтал буолуохтун, инникитин да ситиһиилэр сиэттиһэн, кэрэ ырыалар кэчигирэһэн истиннэр, дьоллоох – соргулаах оҥоойук куруук толору буоллун! “Отонфест” эһиил көрсүөххэ диэри!
