Фестиваль үс сиринэн тэҥинэн ыытылынна. Ол курдук Олег Лебедев аатынан спортивнай саалаҕа футбол, канат, көрдөөх старт күрэхтэһиилэрэ буоллулар. Ыччаттар квиз-оонньууга, дебатка, бырайыак көмүскээһинигэр бырааттыы Николаевтар ааттарынан орто оскуолаҕа куоталастылар.
А.М. Сидорова аатынан «Ситим» КК фестиваль культурнай түһүмэҕэ ыытылынна. Ыччат дьоммут инсценированнай ырыаҕа, театральнай туруорууга, үҥкүүгэ сатабылларын, көхтөрүн көрдөрдулэр. Ол курдук исценированнай ырыа күрэҕэр “Мичилий” (Нөмүгү хамаандата )“Дьоллоох дьиэ кэргэн” ырыанан бастаата, иккис “Аар Саха” Покровскай к. “Моя семья” ырыатынан, үһүс – «Дьулуур» Дьэр нэһилиэгин ыччата «Саха ыала»ырыатынан буоллулар. Хамаандалар бииртэн биир үчүгэй инсценировкалаах, ырыалаах буолан көрөөччү ытыһын тыаһа хабыллан олордо.
Бу күн иккис түһүмэҕинэн театральнай туруоруу күрэҕэ буолла. Дьэр ыччата «Ийэ- олох кыната» диэн туруорууну итэҕэтиилээхтик арыйан бастаата, иккис миэстэни «Бөртө» хамаанда «Эбээм кэпсээнэ» туруоруунан ылла. Ыаллыы Дьөппөннөрбүт «Омоҕойдоох Эллэй» сценканан үһүс миэстэни ыллылар. Бу түһүмэххэ саҥа хайысханы — күлүгүнэн мини испиктээги балай эмэ хамаанда киллэрэ сатаабытын бэлиэтээтибит. Күөрдэммит ыччата Иван Арбита «Долгуннар» поэматыттан «Сылаас биһик» диэн композицияны туруорда уонна IV миэстэни ылла. Арбыыта айымньытын эдэр ыччат саҥалыы көрбүтүн көрөөччү биһирээтэ.
Иккис күҥҥэ үҥкүү күрэҕэ көрөөччүнү түмтэ. Хамаандалар ох курдук оҥостон, кустук курдук куоһанан «Танцы народов мира» тиэмэни арыйдылар. Узбек, индия, монголия, кытай, казах, саха, нуучча омук үҥкүүлэрин көрдөрдүлэр. Бастакы миэстэни кытай омук үҥкүүтүнэн «Молодой Покровск» ылла. Иккис миэстэ пловунан күндүлээбит узбектар «Сарыал» ыччат ансамбла (Булгунньахтаах)буолла, үсүһү «Бөртө» хамаанда казахскай үҥкүүнү көрдөрөн ылла. Төрдүс миэстэни «Күрүлгэн» ыччат үҥкүүтүн бөлөҕө (Күөрдэм) «Табунщицы» монгольскай тэтимнээх үҥкүүтүнэн ылла.
«Сомоҕол» ыччат фестивалын үөрүүлээх арыллыытыгар СӨ спортка миниистирэ Л.Н. Спиридонов, СӨ ыччат уонна социальнай коммуникациятын министерствотын иһинэн ресурснай киин сүрүннүүр специалиһа Д.Л. Васильева, Хаҥалас улууһун баһылыга Иринеев О.В. эдэр ыччакка эҕэрдэ тылларын тириэртилэр. Сомоҕолоһуулаах, эйэлээх, түмсүүлээх, дьулуурдаах, саҥаны айар – тутар эрэллээх, кимиэллээх буоларга ыҥырдылар. Фестиваль арыллыытын силигин Анна Иванова, Прасковья Сивцева кэрэ куоластара, волонтер оҕолорбут киириилэрэ ситэрдэ.
Ыччакка аналлаах шоу – программаҕа кэтэһиилээх- күүтүүлээх Jeada, DJ Ashimi, Flow, Tyas-Uus, Adiray Re кыттыыны ыллылар. Ыччат дьон аныгы тэтимнээх ырыанан, 00 сыллартан хит буолбут «Мин сахабын», “Атаарабын”, “Мөккүспэппин” о.д.а. билиҥҥи кэм ырыаларынан үҥкүүлээн сэргэхсийдилэр. «Молодой Покровск” хамаандаттан Никита Костецкай Джида айар бөлөҕөр кыттыһан, хайыы үйэ ыллаһа сылдьарыттан үөрдүбүт.
Дьэ, иккис күн киэһэтигэр үс сиринэн күрэхтэспит ыччаттарбыт «Ситим» КК тоҕуоруһа муһуннулар. Дьүүллүүр сүбэ уонна тэрийээччилэр маннык түмүктэри билиһиннэрдилэр:
Видеоролик күрэҕэ: 1 миэстэ- Нөмүгү, 2 миэстэ- Төхтүр, 3 миэстэ- Дьэр;
Квиз-оонньуу: 1 миэстэ- Покровскай, 2 миэстэ- Хачыкаат, 3 миэстэ- 1 Дьөппөн;
Дебат: 1 миэстэ- Покровскай, 2 миэстэ-1 Дьөппөн, 3 миэстэ- Нөмүгү;
Бырайыак: 1 миэстэ- 1 Малдьаҕар, 2 миэстэ- Нөмүгү, 3 миэстэ- 1 Дьөппөн;
Спортивнай түһүмэх: Көрдөх стартар- 1 миэстэ- Покровскай, 2 миэстэ- 2 Дьөппөн, 3 миэстэ- Арктикатааҕы агротехнологическай университет Өктөмнөөҕү филиала;
Мини- футбол: 1 миэстэ- Нөмүгү, 2 миэстэ- Покровскай, 3 миэстэ-Мохсоҕоллоох;
Канат: 1 миэстэ- Дьэр, 2 миэстэ-Тумул, 3 миэстэ- 1 Дьөппөн;
Онон 10 көрүҥ түмүгүнэн: 1 миэстэ- Покровскай, 2 миэстэ- Нөмүгү , 3 миэстэ-Дьэр буоллулар.
Тэрийсибит олохтоох дьон быһыытынан 2 Дьөппөн нэһилиэгин үлэ тэрилтэлэрэ биһирээбит хамаандаларыгар сэмэй бэлэхтэри туттардылар. Саамай ыраахтан айаннаан кэлбит Иһит нэһилиэгин көхтөөх эдэр ыччатыгар олохтоох дьаһалта “Ректайм” хампаанньаҕа 15 000 солк сертификат, 1 Дьөппөн лидерыгар үчүгэй бырайыагын иһин 2-Дьөппөн орто оскуолата анал бириис – мультиварка туттарда, «Туллукчаан» оҕо саадын коллектива- уһуйааҥҥа аналлаах бырайыак иһин Мохсоҕоллоох хамаандатыгар сертификат биэрдэ, нэһилиэк культуратын эйгэтин үлэһиттэрэ уонна Л.Я. Гермогенова аатынан норуот тыйаатырын артыыстара солбук ыччаттарбыт талааннара үүнэ- сайда турдун диэн “Күрүлгэн”олохтоох ыччат түмсүүтүгэр анал бэлэхтэрин ууннулар. Уот ситимин үлэһиттэрин коллектива анал спортивнай заала суох эрээри мини-футболга үчүгэй киирсиилэрин бэлиэтээн туран Өктөм хамаандатыгар анал бириистэрин туттардылар.
Ити курдук айар – тутар кэскиллээх ыччаттарбыт биир дьиэ кэргэн курдук эйэлээхтик саҥа олох тэһиинин тутан, үүнэ- сайда турдуннар.
