От ыйын 19 күнүгэр Күөрдэмҥэ бэрт дьикти  дьарыктаах дьон анаан – минээн кэпсэтэ, дьону кытта сэһэргэһэ диэн кэлэн бардылар. Ол «АЙЫЫ САНАА АЙАНА» (Путь добра) диэн төрөөбүт сири- дойдуну үөрэтэр, бэйэни иһиллэнэр, ис  кыаҕы арыйар, дьону – сэргэни кытары билсиһэр, сахалыы тыыны уһугуннарар бырайыак кыттыылаахтара буолаллар. Бырайыак салайааччыта Протодъяконов Александр Константинович «Айгы ситимэ» түмсүү салайааччыта, урбаанньыт. Олус интэриэһинэй кэпсээннээх буолла. Кини “ТӨРӨӨБҮТ ДОЙДУНАН САТЫЫ ХААМЫЫ» олус туҺалааҕын,бэйэтэ араас арыйыылары оҥорбутун, бу хаама сылдьан саха кимтэн- туохтан төрүттэммитин , ону таһынан Өймөкөөҥҥө буолбут «ОЛОҤХО ЫҺЫАҔЫТТАН» сонуннары сиһилии кэпсээтэ. Өймөкөөҥҥө урбаанньыт – меценат, 2 гилдьиялаах атыыһыт Н.О.  Кривошапкин музей дьиэтигэр сахалыы санаалаах дьон мустан сэһэргэһэр төгүрүк остуолун тэрийбиттэр. Олус көдьүүстээх кэпсэтии тахсыбытын сэһэргээтэ. Кини кэргэнэ, Аля Петровна Аммосова Кулаковскай –Өксөкүлээх Өлөксөй сэргэлэрин, Кулаковскай уонна Ньукулай Кырбаһаакын доҕордоһууларын, төгүрүк остуол тэрээһин чааһын сырдатта. Сатыы хаамыы туһатын бигэргэттэ. Анна Андреевна  Холмогорова, этнопедагог, фольклорист, общественник бу кэпсээни түмэн,  бар дьон түмсүөхтээх, бары бииргэ буолан сайдыыга үлэлэһиэхтээхпитин. Мэҥэ Хаҥалас , Хаҥалас уонна Горнай улуустара холбоһон улахан хамсааһыны таһаарыахтаахпытын олус үчүгэйдик сааһылаан, итэҕэтиилээхтик кэпсээтэ. Уопсайынан  бары биир санаалаах дьон  Мэҥэттэн сатыы хааман кэлэн кэпсээн- ипсээн барыылара , салгыы Хачыкаакка айанныыллара  туспа сонун,   ураты көстүү.  Хамаандаҕа  Екатерина Прокопьевна Копырина ,  үлэ ветерана, уйулҕаһыт, алгысчыт, отоһут;  Эрэлчээнэ Никифоровна Слепцова саха тылын, фольклорун учуутала; Бээрийэ  кыыһа Хотойук Айгыына -суруналыыс, суруйааччы,СӨ суруйааччыларын правлениятын чилиэнэ бааллар. Бары тус – туһунан дьон , ол гынан санаалара, үрдүкү идеялара – сомоҕолоһуу. Билиҥҥи балысхан сайдыы кэмигэр бу Мэҥэ уонна Дьөппөн – Хачыкаат форпост буоллугут дииллэр. Онон тас дьайыыга бэриммэт, бэйэбит ис чиҥнээх буолуохтаахпыт, элбэхтик көрсөн кэпсэтэн, сүбэлэһэн саҥа олоҕу тутуохтаахпыт. Туора дьайыыга, мөкү көстүүгэ утарылаһыахтаахпыт диэн санааны сахтылар. Онно биллэн туран доруобай, ыраас чэбдик тыллаах, итэҕэллээх, инникилээх,кэскиллээх буолуохтаахпыт, онно бары кыһаллыахтаахпыт. Ол сатыы айантан саҕыллар диэн бигэ санааларын эттилэр. 

Дьэ уонна бетонунан оҥоһуктарбытын , фестивалы, ол иннинэ  2018 с. буолбут «Тимиринэн уһаарыы» диэн төгүрүк остуолу элбэхтик санаан хайҕаатылар. Бары бииргэ үлэлэһиэҕиҥ диэн ыҥырдылар. Сарсыныгар Самыртай скверин ыраастыыр субуотунньук ыҥырыытын өйөөн үөрэ- көтө көмөлөһөн , кэпсэтиһэн араҕыстылар.  

«АЙЫЫ САНАА АЙАНА» АЛГЫСТААХ, КИЭҤ ААРТЫКТААХ БУОЛЛУН!