Эһигини СР Оҕо саас сылыгар үтүө үөрэх, үлэ дьылын ситиһиилээхтик түмүктээбиккитинэн уонна Тиһэх чуораан чугдаарбытынан А.М. Сидорова аатынан «Ситим» КК коллективын аатыттан итиитик- истиҥник эҕэрдэлиибит.
“Быраатыы Николаевтар”ааттарынан орто оскуола уонна «Ситим» КК быстыспат ситимнээхтэр. Оскуола үөрэнээччитэ, үлэһитэ Култуура киинин саалатыгар ыллаабатаҕа, коллективын кытары тэҥҥэ култуурунай тэрээһиннэргэ кыттыбатаҕа диэн суох буолуохтаах. Быйылгы үөрэх дьылыгар оскуола уонна кулууп ыкса ситимнээхтик үлэлииргэ болҕомто туһаайдыбыт. Ол курдук «Күөртээх Күөрдэмнэр» бырайыак чэрчитинэн «Күөртээх уустар» диэн остуол оонньуута оҥоһулунна, олоҥхо, хомус, оһуокай күннэрэ ыытылыннылар. Хоһоон ааҕыытын күннэрэ, поэзияҕа холонуулар, кылаас чаастар, көрсүһүүлэр, күрэхтэр тэрилиннилэр. Инникитин да сүбэбитин холбоон нэһилиэкпит сайдыытыгар үлэлэһэ турар былааннаахпыт. Онон ситиммит өссө бөҕөргүү, чиҥии турдун.
Күндү оскуоланы бүтэрээччи выпускниктар 9, 11 кылаас үөрэнээччилэрэ! Эһиги олоххутугар бастакы эппиэтинэстээх кэм үүммүтүнэн, бэйэҕит эт- хаан, өй- санаа өттүнэн кыаххытын тургутан көрөр түгэҥҥит кэлбитинэн эҕэрдэлиибит. Бу күн алгыһын ылынан, эһиги олоххут бигэ туруктаах, инникигэ эрэллээх буоллун. Ыарахантан хаһан да чаҕыйымаҥ, өрүү ырыа аргыстаах моһоллору туораан иһиҥ. Оччоҕо эһиги олоххутугар ситиһии, үрдэли ылыы аана арыллан иһиэҕэ. Чөл олох төрдүн тутан, алгыстаах айан аартыгынан дьоллоохтук- соргулаахтык айаннааҥ. Ханна да сырыттаргыт билии биэрбит учууталларгытын, оскуолаҕытын, төрөөбүт – улааппыт нэһилиэккитин, сахаҕыт тылын, төрүккүт тыынын умнумаҥ, махтана ахтыҥ.
Бука барыгытыгар ситиһиилэри, дьолу- соргуну баҕарабыт. Үүммүт самаан сайын үгүс үөрүүлээх түгэннэри, үгүөрү үүнүүнү, уйгуну- быйаҥы аҕаллын.

Эҕэрдэни кытта Акулина Михайловна Сидорова аатынан
«Ситим» КК
Ыам ыйын 27 күнэ, 2024 сыл