Күөрдэмҥэ Р.К. Захаров аатынан «Самыртай» музей комплекска ыам ыйын 5 күнүгэр уоттаах сэрии бэтэрээнэ, Берлиҥҥэ тиийэ сэриилэспит, элбэх бойобуой наҕараадалаах Куприянов Егор Николаевич II уонна кинин олоҕун аргыһа тыыл, үлэ бэтэрээнэ, элбэх оҕо ийэтэ Лебедева Матрена Васильевна сырдык кэриэстэригэр «Кыайыыны уһансыбыттара» кинигэ сүрэхтэниитэ буолан ааста. Кинигэни Киприяновтар оҕолоро Елена Егоровна, Любовь Егоровна олус кыһаллан таһаарбыттар, үгүс дьонтон ахтыы хомуйан, хаартыскалаан интэриэһинэй гына таҥмыттар.
Презентацияны 2 Дьөппөн орто оскуолатын 4 кылааһын үөрэнээччилэрэ, кылаас салайааччыта Наталья Николаевна Климентова «Саллаакка» композициянан саҕалаатылар. Тэрээһини модельнай библиотека салайааччыта Ньургуйаана Руслановна Лебедева документальнай чахчыларынан бигэргэттэ. Мотрена Иннокентьевна Захарова «Самыртай» музей дириэктэрэ Киприяновтар дьиэ кэргэн стендэтин оҥорон тэрээһин сыалын- соругун ситэрдэ, тупсарда. Күөрдэм улуу сэрииһитэ, киэн туттар киһибит Егор Николаевич Киприянов сырдык мөссүөнэ утары көрөн мичээрдии олорорго дылы буолла.
Эҕэрдэ, махтал тылларын «Дьөппөн 2-с» нэһилиэк баһылыга Ольга Аполлоновна Петухова, «Бырааттыы Николаевтар» ааттарынан 2 Дьөппөн орто оскуолатын дириэктэрэ Дарья Ивановна Скрябина, А.М. Сидорова аатынан «Ситим» КК дириэктэрэ Саргылана Семеновна Федорова уонна чугас ыаллара, аймах-билэ дьоно тириэртилэр. Егор Николаевич, Мотрена Васильевна Киприяновтар дьиэ кэргэн туһунан олус элбэҕи иһиттибит, биллибит. Олорон ааспыт дьоммут- сэргэбит туһунан кинигэ, информация хайаан да баар буолуохтааҕын, ону нэһилиэк тумус туттар дьоно иилээн- саҕалаан ыытыахтааҕын туһунан кэпсэтиһии буолла. Олохтоох оскуола дириэктэрэ Дария Ивановна ветераннарбыт туһунан серия курдук кинигэтэ таһаарыаҕыҥ диэн этиитин олус сонургуу иһиттибит. Бу бачыыны сэрии ветераннарын аймахтара өйүөхтэрэ дии саныыбыт.
Дьоннорун күндүтүк санаан сыралаах үлэни аахсыбакка кинигэ оҥорон таһаарбыт Киприяновтар дьиэ кэргэттэригэр уонна бу тэрээһини иилээн- саҕалаан, ымпыгар – чымпыгын ситэрэн салайан ыыппыт «Самыртай» музей коллективыгар махтанабыт.
А.М. Сидорова «Ситим» КК коллектива
