Кулун тутар 5 күнүгэр Аҕыйах ахсааннаах хотугу төрүт омук тыйаатыра “Преданность” спектакль көрдөрөн ааста. Испэктээх Кэбээйиттэн төрүттээх тапталлаах суруйааччыбыт Николай Лугинов «Кустук» сэһэнигэр олоҕурбут. СӨ норуот суруйааччыта Николай Лугинов Хаҥаласка кэлэн суруйааччы буолбутум диэни астына истээччибит.Дьэ, онон испэктээҕи биир тыынынан астына көрдүбүт.

Испэктээххэ  сүрүн оруолу-Кустугу, ииппит-үөрэппит оҕобут Сергей Скрябин толордо. Сергей эбэтин-эһэтин өттүттэн талааннаах, чаҕылхай дьон үгүс. Биир дойдулаахпыт, үөрэппит оҕобут айар-тутар дьоҕура сайда-үүнэ турдун диэн «Ситим» КК аатыттан өйдөбүнньүк бэлэхпитин, эдэр тыйаатырга махтал сурукпутун туттардыбыт. Тыйаатыр саҥаттан саҥа, чаҕылхайтан чаҕылхай артыыстары таһаара, үүннэрэ  турдун. Киэн туттар , таптыыр суруйааччыларбыт айымньылара үйэтиллэн истиннэр.