- Тохсунньу 28 күнүгэр «Истиҥ ырыа» кэнсиэртээх саха эстрадатын ырыаһыттара Константин Степанов, Святослав Эверстов, Дуолан Трофимов ыллаан-туойан аастылар. Чаҕылхай ураты куоластаах ырыаһыттарбыт, сахалыы тыллара-өстөрө ырааһа, устар ууну сомоҕолуур урана, көрөөччү болҕомтотун тардар көҕө киһини үөрдэр. Дуолан Трофимов Түбэ Дьаарханнааҕы КК директорынан ананан, айар-тутар үлэтигэр салайар, иилиир-көҕүлүүр дуоһунастаммыта кэрэхсэнэр. «Култуура үлэһиттэрэ ыытар үлэтин өйөөҥ, хас биирдии кыракый да тэрээһиннэргэ кыттыһан, нэһилиэк култуурнай олоҕун көҕүлээҥ», — диэбитин сөбүлүү иһиттибит. Бу киэһэ дэгэрэҥ ырыанан доҕуһуоллатан үҥкүүлээтибит, оһуохайдаатыбыт. Ахтылҕаннаах алааспытын, куудара кутуруктаах кулунчукпутун, күндээрэр күннээх сааспытын санатар сахалыы ырыаны истэн дуоһуйдубут. Ураты куоластаах ырыаһыттарбытыгар ситиһиилэри, айаас ат арҕаһын үрдүгэр сылдьан айа-тута туралларыгар баҕарабыт.
- Федорова С.С. А.М. Сидорова аатынан «Ситим» КК дириэктэрэ
