“Ситим” КК Аан дойду дьахталларын күнүгэр уонна Холумтан иистэнньэҥнэр  түмсүүлэрэ төрүттэммитэ 10 сылыгар аналлаах үөрүүлээх тэрээһин ыытылынна.

Дьоро киэһэни Аҕа баһылык А.Н. Константинов  кыталык кыргыттарбытын, Иэйэхсит эдьиийдэрбитин, айыыһыт ийэлэрбитин, эбэрикээн эбээлэрбитин сандал сааскы маҥнайгы бырааһынньыгынан эҕэрдэлээтэ, заалга мустубут кэрэ аҥардарга нэһилиэк эр дьоно  сибэкки бэлэхтээтилэр.

Бу күн кэрэ тылларынан кынаттаан «Ис сүрэхтэн» түһүлгэҕэ Күөрдэммит сирин сылаас тыынныыр, эйэҕэс эркинниир “Холумтан”түмсүү кыттыылаахтарын, түмсүү  төрүттэммитэ  10 сыла  үүммүтүнэн  эҕэрдэлээтибит.  Норуот  төрүт  дьарыгын  сөргүтэн, иистэнэргэ ылсыбыт «Холумтан» түмсүү аата улуус, республика  таһымынан ааттанар буолла. Бары араас  эйгэҕэ үлэлээбит ыал ийэлэрэ, эбэлэрэ билигин «Холумтаҥҥа» айар дьарыктарыгар үөрэ-көтө мусталлар. Дария Семеновна Киприянова «Холумтан» түмсүү салайааччыта, үлэни  иилиир- саҕалыыр, күөттүүр  киһинэн буолар.   Билигин иис-күүс араас хайысхатыгар  Холумтаннар  суолларын- иистэрин тобулан дьарыктаналлар.  Бэйэ- бэйэлэрин ситэрсэн, толорсон биэрэллэр. Онтон киһи дууһатын  сылаанньытар кэрэ оҥоһуктар айыллаллар.  «Холумтан» түмсүү  үлэтин сырдаттахха:

-Улуус ыһыаҕар «Ат симэҕин» күрэҕэр   2 үрдэл  аатын ылбыттара;

-Хаҥалас улууһугар Республикатааҕы  Олонхо ыһыаҕар, «Ат симэҕин»  Кылаан  кыайыылааҕа;

-Колодинская Анна Николаевна – улуус, республика араас таһымнаах быыстапкаларын, көрүүлэрин кыайыылааҕа;

— «Холумтан» түмсүү иһинэн тэриллибит «Алгыс» ансаамбыл –«Тыгын сыдьааннара» саха фольклорун улуустааҕы фестивалын кыайыылаахтара;

— Нэһилиэк «Бастыҥ түмсүүтэ» анал аатын ылбыта;

— «Күн Дьөһөгөй»  улуустааҕы көрүү- быыстапкаҕа бастакы миэстэ;

— Дьокуускайга Хаҥалас улууһун күннэригэр быыстапкаҕа кыттыы

Бу киэһэ нэһилиэк эр дьоно ыллаан – туойан кэрэ аҥардары эҕэрдэлээтилэр. Сонун ааттары, саҥа толоруулары көрөн – истэн, кэрэ аҥардар ытыстарын тыаһа хабыллан олордо.

         Сонун нүөмэрдэр кэннэ эр дьон үтүө- мааны  тылларынан өссө төгүл эҕэрдэлээн  минньигэс тордунан күндүлээтилэр.

Бу сырдык сааскы күн эһиги дьиэ кэргэҥҥитигэр уйгуну-быйаҥы, үлэҕитигэр-хамнаскытыгар үрдүк ситиһиини, чэгиэн-чэбдик туругу уонна үйэлээх уостубат тапталы сахтын. Олоххут-  хоту дойдубут кылбаа маҥан хаарын курдук ыраас, аламай маҥан күнүн курдук чаҕылхай буоллун!