Дьол уйатын бэйэҥ тутун

Ол буолар эн толору кутуҥ.

“ДЬОЛ УЙАТА» Хаҥаластааҕы дьиэ кэргэн сайдыытын өйүүр олохтоох уопсастыбаннай тэрилтэ Дьиэ кэргэн уонна Оҕо саас сылынан нэһилиэктэринэн көрсүһүүлэри саҕалаата.

Бастакы көрсүһүүнү 2-Дьөппөн дьонугар- сэргэтигэр тэрийдэ. Ол курдук «Дьоллор» маннык интэриэһинэй программалааах маастар кылаастарынан ыалдьыттаатылар.

— Макраме-баайыыта «Сибэккигэ кашпо»- Латышева Алексана Юрьевна;

— «Алгыстаах мыыла» — Максимов Эдуард Владимирович;

— «Сымнаҕас олбохтоох кухняҕа дьыбаан» — Ксенофонтов Владислав Владимирович;

-«Ханнык дьиэ көтөрүн Саха сиригэр иитэр ордугуй?» — Ксенофонтова Ванесса Владимировна;

— «Дьол уйата» дьиэ кэргэн сайдыытыгар ханнык кризистар баалларын үөрэтэр, ис сыһыанын күүһүрдэр дьарыгы Ксенофонтова Светлана Давыдовна,  «Үлэ — Дьол» (Үлэттэн үөрэбин) — күннээҕи түбүктэн, үлэттэн саллыбыт, сылайбыт санааны сатаан көтөҕөргө үөрэтэр ньымалары Прокопьева Пелагея Петровна тэринэн кэлэн ыыттылар.

Общественнай тэрилтэ 10 тахса сыллааҕыта тэриллибит уонна бу 2021 c. сокуонунан бигэргэтиллэн үлэтэ- хамнаһа көмүскэллээх буоларын ситиспит. Тэрилтэ 10 тахса киһилээх общественнай түмсүү курдук дьаһанан үлэлиир. Дьон – сэргэ олоҕун оҥосторугар көмөлөһөр, сүбэлиир, үөрэтэр, дьарыктыыр сыаллаах. Тэрилтэ салайааччыта Светлана Давыдовна Ксенофонтова көрсүһүү саҕаланыытыгар мустубут дьоҥҥо үлэтин- хамнаһын сырдатта. Ол кэннэ бары маастар кылаастарга тарҕаһан дьарыктаннылар.

Владислав Владимирович ох курдук оҥостон кэлэн дьоҕус дьыбаан оҥоруутугар үөрэттэ. Дьыбаан матырыйаалын барытын бэлэмнээн, туттар тэриллэрин тиэйэн аҕалан сүрдээх мындыр үлэни икки –үс чаас иһигэр оҥорон көрдөрдө. Маастар кылааска сылдьыбыт дьон сэрэбиэйдэһэн,  Алексей Киприянов дьыбааны сүүйэн ылла. Онон дьонугар олус үчүгэй бэлэх оҥордо.

Трениннэргэ сылдьан киһи сайдар, анаара- алтыһа үөрэнэр. Пелагея Петровна, Светлана Давыдовна идэлэринэн психологтар. Тренинг кыттыылаахтарыгар олус  интэриэһинэй уйулҕа  ньымаларын көрдөрдүлэр, туһанарга сүбэлээтилэр, үөрэттилэр. Ол курдук пластилынан үлэлээн туругу тупсардылар. Анализтаан көрөн бэйэ күүстээх уонна арыый тутах өттүн бэлиэтииргэ үөрэннилэр. Аныгы олох тэтимэ, хайыр курдук элбэх информацията киһини баттыыр, ыгылытар. Ону сылайыыны киһи күлүү нөҥүө, психологическай, физическэй  дьарык, сэһэргэһии  нөҥүө сатаан уста үөрэниэхтээҕин оҥотторон көрдөрдүлэр, үөрэттилэр.

 Онтон көрсүһүү сорохторо Ванесса Владимировнаттан ханнык көтөрү иитиэххэ сөбүн сүбэлэттэрдилэр. Куурусса, сымыыт,бройлер, чоппууска көрөн- истэн бэйэ бизнеһин тэринии туһунан кэпсээнин сэргээтилэр. Алексана Юрьевна уран тарбахтаах, элбэх оҕолоох эдэр ийэ эдэрдэргэ бэйэ сөбүлүүр дьарыгын кытта оҕо иитиитин, дьиэ ис бараанын киэргэтиини хайдах дьүөрэлииргэ сүбэлээтэ. Эдуард Владимировичтан мыыла, чүмэчи оҥоруутугар үөрэннилэр, сүбэ- ама ыллылар.

Кэлбит дьон сүрдээх астынан, талбыт маастар кылаастарыгар сылдьан дуоһуйа кэпсэтэн, уоппут бөҕө ылан, махтал тылларын этэн тарҕастылар.