Ыам ыйын 31 күнүгэр Күөрдэмнээҕи 25 №дээх «Туллукчаан» оҕо саада «Дьиэ кэргэним – кэрэҕэ угуйар биһигим” диэн ааттаах көрүү – күрэҕи тэрийдэ. Оҕо-аймах  биһигин иитээччилэрин, иитиллээччилэрин уонна төрөппүттэрин көмөтүнэн бэрт истиҥ- иһирэх тэрээһин буолла. Бу ырыа- тойук, үҥкүү- битии эрэ түһүлгэтэ буолбатах , манна уһуйааны түмүктүүр оҕолор төрөппүттэрин кытта дьиэ кэргэнинэн күрэхтэстилэр. Киһи үөрэрэ диэн түөртүү- биэстии  оҕолоох төрөппүттэр  дьиэ кэргэттэрин туһунан кэпсээтилэр, сахалыы таҥас арааһын көрдөрдүлэр, талба талааннарын арыйдылар уонна уһуйааннарыгар бэйэ оҥоһуга бэлэх бэлэхтээтилэр. Юлия Семеновна, Иннокентий Иванович Прокопьевтар 3 оҕо күн күбэй ийэтэ, аҕата буолаллар. Юлия Семеновна дэгиттэр талааннаах-  асчыт, уран тарбахтаах иистэнньэҥ, үҥкүүһүт бэрдэ буоларын билэбит. Онон дьүүллүүр сүбэ Прокопьевтар дьиэ кэргэттэригэр «Айар куттаах дьиэ кэргэн» диэн анал номинация иҥэрдэ. Инна Иннокентьевна, Ариан Александрович Захаровтар биэс оҕо иһирэх ийэтэ- аҕата буолаллар. Кэтэх хаһаайыстыбанан дьарыктаналлар, сүөһү – ас ииттэн дьиэ кэргэни хааччыйаллар. Инна Иннокентьевна эмиэ олус талааннаах ийэ, асчыт үтүөтэ, кылыһахтаах куоластаах ырыаһыт буолар. Оҕолорун ыллатар, оһуохайдатар, хомуска уһуйар. Онон бу дьиэ кэргэҥҥэ  «Төрүт үгэһи тутар дьиэ кэргэн » анал аат иҥэрилиннэ. Софронеевтар дьиэ кэргэн быйылгы дьылга Күөрдэмҥэ көһөн кэлэн олохсуйдулар. Ыал ийэтэ Елена Аркадьевна эмиэ асчыт мааныта, иистэнньэҥ  бастыҥа,аҕа Владислав Витальевич  спортсмен бэрдэ. Кинилэргэ «Иллээх дьиэ кэргэн»  анал аат иҥэрилиннэ. Макаровтар дьиэ кэргэн дьонун  бизнеһын салҕаан үлэлии – хамсыы сылдьаллар. Нэһилиэккэ ыытыллар култуура тэрээһиннэрин эрэллээх спонсордара буолаллар. Айталина Валерьевнаҕа, Иван Ивановичка «Көрөөччү биһирэбилэ» аат иҥэрилиннэ. Нарыйа Иннокентьевна, Леонид  Леонидович Кривошапкиннар түөрт оҕо ийэтэ, аҕата  буолан олоҕу уһансаллар. Нарыйа олохтоох балыаһаҕа аптекарьдыыр. Медицинскэй сиэстэрэлиир. Дьонугар – сэргэтигэр олус туһалыыр. Бу киэһэ  конкурска олус үчүгэйдик бэлэмнэнэн сиэдэрэй оҥоһуулаах симэхтэри, киэргэллэри, оҥоһуктары көрдөрдүлэр. Икки өттүттэн икки сибэкки кыргыттара, икки көмө уолаттара сиэттиһэн тэбис тэҥҥэ үөрэ- көтө кытыннылар. Бу дьиэ кэргэҥҥэ «Кэрэни кэрэхсээччи» анал аат иҥэрдибит.  Нэһилиэк олоҕор көхтөөх тэрийээччи, кыттааччы быһыытынан Федоровтар эдэр ыал тэҥнээхтэрин булбаттар. Ыал күн күбэй ийэтэ Каролина Петровна ыччат лидерэ. Актыыбынай төрөппүт, үҥкүүһүт. Юристан Семенович олохтоох тыйаатыр артыыһа, спортсмен бэрдэ. Түөрт оҕону сахалыы тыыннаан иитэллэриттэн дьүүллүүр сүбэ олус астынна. Бу дьиэ кэргэҥҥэ «Талба талаан» анал аат иҥэрилиннэ. Дьэ ити күрэх быыһыгар уһуйаан иитээччилэрэ сыл иһигэр үөрэммит үөрүйэхтэрин туоһулаан, ыллаан – үҥкүүлээн эйээрдилэр. Талааннарын тоҕо тэбээтилэр. Көрөөччү ытыһын тыаһа тохтообокко ньиргийэн олордо.

Саргылана Федорова