Бэс ыйын 1 күнүгэр «Бырааттыы Николаевтар ааттарынан уопсай орто үөрэхтээһин оскуолатын» 2 кылааһын үөрэнээччилэрэ уонна төрөппүттэрэ РФ Дьиэ кэргэн, СӨ Оҕо саас сылларыгар анаан “Дьиэ кэргэн- норуот баайа, оҕо-норуот кэскилэ” диэн ырыа- үҥкүү түһүлгэтин төрүттээтилэр.

Кылаас салайааччыта Наталья Николаевна Климентова дьоро киэһэни бэйэтэ иилээн -саҕалаан ыытта. Наталья Николаевна үөрэтэр оҕолоро куруук да сахалыы тыллаах – өстөөх, ырыалаах – тойуктаах буолаллар. Бу да сырыыга оҕолор чабырҕахтаан чубугурастылар, саллааттаан хаамтылар, төрөппүттэрин кытта хомустаан дьүрүһүттүлэр. Оҕолор сүрдээх талааннаахтар, бииртэн биир дьэрэкээн үҥкүүнэн, дьиэрэҥкэйинэн түһүлгэни киэргэттилэр. Концертнай программа быыһыгар лотерея оонньуута ыытылынна. Лотерея түмүгэр кылаас төрөппүттэрэ 34 сылгылаах, 12 ынахтаах, 8 оҕолоох, саамай эдэр эбээ 44 саастаах, кылаас  паартатын ахсаана 13 эбитин онтон да атын чахчылары биллибит. Сэҥээрдибит.  Дьэ ити курдук  көрөөччүлэр араас бириистэри сүүйэн сүрдээҕин үөрдүлэр. Кылаас салайааччыта киирбит үп сааскы халаан уутугар эмсэҕэлээбит Нам улууһун олохтоохторугар ананарын эттэ. Оҕо ырыатын – тойугун быыһыгар көхтөөх төрөппүттэр сатабылларын көрдөрдүлэр. Юлия Прокопьева уус тарбахтаах төрөппүт, оҥоһуктарын көрдөрдө. Инна Захарова оҕолору хомуска , тойукка үөрэппит, Каролина Федорова, Наталья Николаевна үөрэппит оҕото, нэһилиэк ыччатын лидерэ, оҕолорго үҥкүү дьарыгын ыытар эбит. Онон бу тэрээһин төрөппүт- учуутал –үөрэнээччи бииргэ үлэлиир, айар – тутар сыһыаннарын туоһута буолла.

Саргылана Федорова, «Ситим» КК