Олунньу 9 күнүгэр А.М. Сидорова аатынан «Ситим»  КК  «Алгыстаах сахам тыла» саха тылын, суругун-бичигин күнүгэр аналлаах тэрээһин буолла. Тэрээһин «Тюрк омук үлтүркэйэбин» Наталья Харлампьева хоһоонун Мария Михайлова ааҕыытынан арыллан, Аҕа баһылык А.Н. Константинов эҕэрдэтинэн, «Ситим» бөлөх  тойуксуттарынан доҕуһуолланан саҕаланна. Тэрээһин биир  соругунан «Күөртээх Күөрдэмнэр» бырайыак түмүгүн бар дьоҥҥо сырдатыы. Бырайыак Саха тылын департаменынан өйөнүллэн 188 560 солк. сууммалаах  остуол оонньуулара буолан оҥоһуллан таҕыста. Бу күн Самыртай  хочотун оскуолаларын, уһуйааннарын ыалдьыттата ыҥыран «Уус кыһата», «Күөртээх уустар»  остуол оонньууларын  бэлэх-туһах туттартаан ыыттыбыт.  Саха тылын түһүлгэтин сүрүн темата «Сахам мандар иһитэ»  диэн тула ыытылынна. Олохтоох музей маннык темалаах  анал быыстапка олохтоото. Сахалыы иһит – хомуос уһуйаан, оскуола оҕолорун уруһуйун быыстапката  түһүлгэ силигин ситэрдэ.  Тэрилтэ салайааччылара түһүлгэни «Сахам мандар иһитэ» диэн аман өһүнэн ситэрэн- толорон биэрдилэр.  Төрүт иһиппит туһунан интэриэһинэй чахчылары биллибит. 2 Дьөппөн  нэһилиэгин Аҕа баһылыга А.Н.Константинов чороон, олохтоох оскуола дириэктэрэ Д.И. Скрябина кытыйа, уһуйаан салайааччыта Ю.С. Скрябина тууйас, Н.Н. Ефимов кытах, А.Р.Винокуров симиир иһит, Н.В. Маркова кытыйа туһунан уус уран дьүһүйүүтүн кэрэхсии иһиттибит. Ытыс тыаһынан доҕуһуолланна.

Ол кэннэ түөлбэлэр икки ардыларынан «Өркөн өй » күрэх тыҥааһыннаах күрэхтэһиитэ буолла. Буоларын курдук саамай көхтөөх «Аргыс» түөлбэ бастаата.   «Сарыал» түөлбэ олохтоохторо иккис  миэстэ буолан үөрүүлэрин үрдэттилэр. “Чолбон” түөлбэ үһүс миэстэ аатын ылла. Кыайбыт хамаанда оонньуу супер бирииһинэн бэлиэтэннэ.

Бу нэдиэлэҕэ Алгыстаах сахам тыла нэдиэлэ «Сахалыы ааҕыахха» акцията ыыттылла турар. Нэһилиэк көхтөөх дьоно сахалыы ааҕыылар сайтка тахсалларын долгуйа күүтэллэр.

Саргылана Федорова, «Ситим» КК дириэктэрэ