Көнө – мааны хонуулаах Туруук хайа тулалаах Күөрдэммитигэр өссө биир бэлиэ түгэн буолан ааста. Кулун тутар 27 күнүгэр «Самыртай» музей – комплекска биир дойдулаахпыт Игорь Константинов “Айылҕам абылыыр күүһэ” диэн айар быыстапката турда. Быыстапка арыллыытыгар олохтоох дьаһалта баһылыга Александр Николаевич Константинов, Игорь Гаврильевич аймахтара Николаевтар, уһуйбут учуутала Вадим Петрович Адамов уонна бииргэ үөрэммит доҕотторо алгыс тылларын, эҕэрдэлэрин анаатылар.

Быыстапка уруһуйдарын ааптара Игорь Константинов элбэх саҥата- иҥэтэ суох, сүрдээх сэмэй  майгылаах киһи. Ол эрэн айылҕаттан бэриллибит талаанынан тула өттүн кыраҕы хараҕынан көрөр, сөбүлүү көрбүтүн уруһуйдуур. Кини Саха сирин сайынын, кыһынын олус табатык хоһуйан холустаҕа түһэрэрин сөҕө- махтайа көрдүбүт. Туспа турук, истиҥ иэйии алыбыгар киирэн кэрэни кэрэхсии, дуоһуйа ылынныбыт. 

Күһүн Игорь Константинов быыстапката Хаҥалас киинигэр Покровскай куоракка, ол кэннэ Туймаада эбэ хочоҕо турара былааннанар. Сонун хартыыналар, саҥа санаалар эһигини күүтүөхтэрэ. Айылҕаттан талааннаах Игорь Гаврильевич үлэлэрин астына-дуоһуйа көрүөххүт, саҥа саҕахтары арыныаххыт, кэрэ эйгэтигэр умсугуйа устуоххут  диэн эрэнэбит.

              Саргылана Федорова, А.М.Сидорова аатынан «Ситим» КК