Кулун тутар 14 күнүгэр, кыраайы үөрэтэр В.Г.Белинскай аатынан бибилэтиэкэҕэ Елена Антонова — Күн Сиккиэрин икки сабыс-саҥа буруолуу сылдьар»Хотун Бүлүүм — Күн Бүлүүм» уонна «Үрүҥ күн айыыһыттаах» кинигэлэрин биһирэмэ буолан ааста.

Биһирэм дьоҕус саха салаатын саалатыгар ыытылынна. Бу дьоро киэһэни  Саргылана Федорова — Саргылана Сайын хомоҕой, уус-уран  тылынан долгутуулаахтык ыытта.

Биһирэм Күн Сиккиэрэ бэйэтин ылбаҕай хоһооннорун ааҕыытынан саҕаланна, саала иһэ дьикти сылаас турукка куустарда. Бу ырыа курдук матыыптаах, истиҥ сахалыы баай төрүт дорҕоонноох хоһооннору барытын эт кулгаахпытынан истэ олорон, оттообут ходуһабытыгар, төрөөбүт алааспытыгар, ыйдаҥалаах түүҥҥэ, таптал имэҥнээх түүннэригэр күүлэйдээн, таалалыы көччүйдүбүт. Салҕыы музыка кэллиэһин устудьуоннарын ансаамбыла (сал.Э.К.Соколова, А.И.Томская)төрүт дорҕоон инструменнарыгар дуораһыта оонньоотулар, ол  доҕуһуолугар уйдаран хоһооннор долгун курдук субуһа уһуннулар, хоһоон киэһэтэ сахалыы муусука дьиэрэйигэр өссө киэркэйэн тубуста. Антонина Христофорова- Хагдаанай » Үрүҥ Күн айыыһыттаах» диэн кинигэни ,көҥүллэх тириини сатабыллаахтык эрийэ тутан имитэрдии, үрдүк таһымнаахтык анааран ырытта. Эдэр сааска бииргэ устудьуоннаабыт үөлээннээхтэрэ иһирэх ахтыылаах, ичигэс  эҕэрдэ тыллара кэлбит дьону мичээр кыымнаатылар. Кэрэ түгэҥҥэ тиксиһэ кэлбит дьон, биир — биир эҕэрдэ уонна истиҥ махтал тыллары этэн Күн Сиккиэрин   үрдүк мэҥэ халлааҥҥа көтүттүлэр, күүһүгэр күүс эптилэр.

Кырдьык да тоҕуоруһа мустубут дьон, дьиҥнээх иэйиилээх хоһоон алыбыгар ылларан, атын аптаах эйгэҕэ бүүс бүтүннүү куустаран санаалыын, дууһалыын чэпчээн, Күн Сиккиэрин дириҥ ис хоһоонноох,  иэйиилээх ыраас үрүйэ уутун курдук сөрүүн, дьэҥкир сүүрүгэр умсан ырааһыран,  сырдаан олус дуоһуйа астынныбыт. Истиҥ махтал тыллары этиэхпин баҕарабын тэрийэн ыыппыт үтүө киһибитигэр Саргылана Сайыҥҥа, бибилэтиэкэ кэрэ кыргыттарыгар. Бүгүҥҥү наһаа кэрэ  тырымныыр сулустаах хоһоон хонуутугар дьаарбатан, үгүс мичээри, үөрүүнү бэлэхтээбит күндү киһибитигэр Күн Сиккиэригэр чэгиэн — чэбдик доруобуйаны, айар үлэтигэр үрдүк ситиһиилэри, бараммат тапталы, толору дьолу, этэҥҥэ буолууну баҕарабыт.

Инна Николаева — Угинка
Кулун тутар 14 күнэ 2026с.