Кулун тутар 14 күнүгэр А.М. Сидорова аатынан “Ситим” КК Кыайыы 80 cылыгар аналлаах Күөрдэм нэһилиэгин түөлбэлэрин икки ардыларынааҕы көрүү күрэх буолан ааста. Күрэххэ «Сарыал» (салайааччы Александрова О.В.), «Аргыс» (салайааччы Львова А.А.), “Чолбон” (салайааччы Михайлова В.И.) түөлбэлэр кытыннылар. Дьүүллүүр сүбэҕэ Федорова К.П. ыччат лидерэ, «Эрчим» түөлбэ салайааччыта уонна хас биирдии түөлбэттэн представителлэр Ефимова С.Р., Лебедева О.Н., Бодрова О.А. үлэлээтилэр. Түөлбэлэр 6 жанрынан кытыннылар. Ол курдук:
- Кыра кээмэйдээх фольклор көрүҥэ;
- Олоҥхоттон быһа тардыы;
- Испиктээкил (10-15 мүн.)
- Вокал (соло эбэтэр дуэт);
- Вокальнай ансамбль;
- Үҥкүү.
Көрүү- күрэс түөлбэ дьонун кытыннарар, саҥа талааннары арыйар уонна улуустааҕы көрүү- күрэххэ бэлэмниир соруктаах көрүү – күрэх буолла. Түөлбэлэр бары жанрынан кытыннылар. Олоҥхо туруоруутун жюри да, көрөөччү да ордук биһирээтэ. Урукку өттүгэр бу жанр дьон ыарырҕатар буолан туруоруллубат этэ. Билигин хас биирдии түөлбэ ис, тас кыахтары туһанан олоҥхо туруорбуттарын сэргээтибит. “Аргыс”түөлбэ- “Дьырыбына Дьырыалыатта” П. Ядрихинскай – Бэдьээлэ олоҥхотуттан быһа тардан туруорда. Манна олоҥхоһут кыыспыт Прасковья Лебедева — “Куйуур олоҥхото 2022, 2024 с.с”– 1 Үрдэл хаһаайката; СӨ Ил Түмэн бэрэссэдээтэлэ, А.Н. Жирков анал бирииһин уонна ХИФУ профессора Галина Семеновна Попова – Санаайа анал бирииһин хаһаайыннара, Амма улууһугар ыытыллыбыт «Саҥарар саҥам сататын сабаҕалааҥ, этэр тылым эгэлгэтин эридьиэстээҥ» диэн Олоҥхо ыһыаҕын «Уһун тыыннаах олоҥхоһут» анал аат хаһаайына, бу сырыыга түөлбэтин дьонун кытта олоҥхолоон доллоһутта, истиэххэ кэрэ да буолла. Бииртэн биир саҥа нүөмэрдэр, көрүөххэ- истиэххэ сонун. Биһиги, култуура үлэһиттэрэ, дьоммут- сэргэбит үмүөрүһэн туран кэлбиттэриттэн, үөрэ – көтө бэлэмнэнэн, таҥас- сап бэринэн кыттыбыттарыттан сүргэбит көтөҕүлүннэ. Жюри маннык түмүгү таһаарда:
Номинациялар:
- “Бастыҥ ырыа”– Нария Говорова, «Тучи в голубом»
- “Бастыҥ үҥкүү”– « Аргыс » түөлбэ, “Катюша” үҥкүү
- “Бастыҥ олоҥхоһут”- Инна Захарова, Той Дьэримиэй- Чэмэриллэ Чээчик
- “Бастыҥ фольклору пропагандалааччы”- Тамара Лебедева, долганскай үҥкүү
- «Бастыҥ оруол»- Олеся Александров
- “Бастыҥ вокальнай ансаамбыл” -“Чолбон”түөлбэ, «Ыллаа, миэхэ сиэстэрэм»
Түмүк маннык буолла:
1 миэстэ- «Сарыал» (салайааччы Александрова О.В.),
2 миэстэ- “Чолбон” (салайааччы Михайлова В.И.)
3 миэстэ- «Аргыс» (салайааччы Львова А.А.)
Кыттыбыт бары дьоммутугар- сэргэбитигэр махтал мааныта буоллун. Аны улуустааҕы көрүү-күрэххэ бу курдук күүспүтүн холбоон кыттыахпыт диэн эрэнэбит.
Саргылана Федорова
