Улуу Кыайыы сир үрдүгэр
Сандалҕаннаах саас кэлбитэ.
Сири бүттүүн дьигиһитэр
Этиҥ буолан ньиргийбитэ!
Кэрэ этэ кини тыаһа-
Кыайбыт тилэх ньиргиэрэ,
Дьикти этэ Кини уота-
Көрбүт харах үөрүүтэ!
Россия эбэ хотун хайа баҕарар муннугар Улууканнаах Улуу Кыайыы 80 сылын өрө көтөҕүллүүлээхтик бэлиэтээтилэр. Онтон туора турбакка биһиги, муус устар бүтэһик күннэриттэн саҕалаан россиятааҕы субботник, үлэ, уруһуй, ырыа, түннүк, чүмэчи акцияларыгар кытынныбыт. Ону тэҥэ нэһилиэккэ 2 Дьөппөнтөн төрүттээх Саха сирин соҕотох баталист худуоһунньуга Иван Лебедев хартыыналарыгар «Хартыынаҕа 80 хоһоон» хоһоон ааҕыытын акцията, Аҕа дойду сэриитин кыттыылааҕын туһунан «Улуу Кыайыы туһунан 80 кэпсээн» акцията ыытылыннылар. Хаалыктаах хаамааччылар «Сканди» түмсүү дьиэ кэргэнинэн уруһуй күрэҕин, «Ситим» КК «Дьиэ кэргэн киэргэппит транспора» күрэҕи, Бырааттыы Николаевтар ааттарынан орто оскуола нэһилиэнньэҕэ “Кыайыы дьыктаанын”, “Кыайыы утумнааччылара” кросс ыыттылар.
Кыайыы күнүгэр, ыам ыйын 9 күнүгэр, Бырааттыы Николаевтар ааттарынан орто оскуолаттан нэһилиэнньэ бүттүүнэ кыттыылаах Парад хаамта. Албан аат обелискатыгар уоттаах сэрии толоонуттан эргиллибэтэх хорсун саллааттарбыт умнуллубат сырдык кэриэстэригэр сүгүрүйэн, Кыайыы кыһыл былааҕын уонна Ийэ дойдубут үс өҥнөөх былааҕын эдэр ыччаттарбыт Егор Киприянов, Авелий Платонов өрө тутан киирэн Кыайыы митинин саҕалаатылар. Митиҥҥэ «2 Дьөппөн нэһилиэгэ» тыа сирин поселениетын баһылыга Ольга Аполлоновна Петухова; сэрии оҕото, СӨ үтүөлээх артыыһа, СӨ култууратын туйгуна Степан Дмитриевич Петров; депутат, олохтоох библиотека заведующайа Ньургуйаана Руслановна Лебедева, депутат “Октябрь 50 сыла сопхуос” ТХПК кэскиллээх салайааччыта Артур Ревович Винокуров эҕэрдэ тылларын тириэртилэр. Митиҥҥэ оскуола үөрэнээччилэрэ “Модун” военнай патриотическай кулууп иитиллээччилэрэ, салайааччы Семен Семенович Поисеев; 4 кылаас үөрэнээччилэрэ «Умнубаппыт, сүгүрүйэбит, киэн туттабыт» хоһоонунан композиция, салайааччы Валентина Герасимовна Гермогенова; хор толоруутугар «Харыстааҥ ветеран дьоннору» эҕэрдэ концерт буолла. Кыайыы вальсыгар 15 паара кыттыста. Кыайыы залпын уруй- айхал этиилээх, ураа хаһыылаах көрүстүбүт. Митины Кыайыы оһуохайынан түмүктээтибит. Оһуохайы 5-6 кылаас үөрэнээччилэрэ таһаардылар. Салайааччы Варвара Романовна Павлова. Ол кэннэ ветераннарбытыгар аналлаах эҕэрдэ концерт, киэһэтин Л.Я. Гермогенова аатынан норуот тыйаатырын режиссера Олеся Викторовна Александрова туруоруутугар «Сэрии кэмин оҕолоро» театральнай дьүһүйүү, быраһынньыктааҕы концерт тэрилинэ. Олохтоох дьон Кыайыы күнүгэр аналлаах тэрээһиннэргэ өрө көтөҕүллэн туран кытыннылар.
Тохсус маай үөрүүтэ
Хаһан да кыччаабат
Өрөгөй ырыата
Хаһан да мөлтөөбөт
Үйэлэр тухары махтана
Ахтыахпыт
Ветеран дьоммутун
Ытыктаан ааттыахпыт.
