Саха Республикатыгар  сайылык күнэ барахсан самаан сайыны көрсө олохтонон саха киһитэ сэргэхсийэр, санаата көтөҕүллэр. Бу күнү баттаһа Оһуохай күнэ ыам ыйын 25 күнүгэр бэлиэтэнэр. Биһиги нэһилиэккэ урукку кэмнэргэ Аҕа дойду Улуу сэриитин кыттыылааҕа, Албан Аат уордьан кавалера, биир дойдулаахпыт Захаров Никита Ильич — Микииттэ кирпииччэлии оһуохай таһааран бар дьонунаан киэҥ түһүлгэ төрүттүүрэ үһү.     Өссө биир талааннаах киһибит- уус тыллаах ырыаһыт, оһуокайдьыт Мария Прокопьевна Сидорова этэ.Кини Горнай Бэс Күөлүттэн төрүттээх, 1942 сыллаахха 16 сааһыгар үлэ фронугар (суол тутуутугар) мобилизацияҕа хабыллан Большой Невер-Алдан-Дьокуускай суолун оҥоһуутугар үлэлээбит. 1945 сыллаахха, онно үлэлии сылдьар Архип Андреевич Скрябиҥҥэ кэргэн тахсыбыта. Мария Прокопьевна иистэнньэҥ, оһуохайдьыт, ырыаһыт, сахалыы таҥаһы, хаһыаччыгы тигээччи буолан дьоҥҥо олуһун сөбүлэппитэ. Үгүс дьахтары сахалыы култуураҕа, ырыаҕа- тойукка уһуйбута диэтэххэ сыыһыахпыт суоҕа. Кини улахан уола Михаил Скрябин, Саха Республикатын культуратын туйгуна, Саха Республикатын уонна Россия Киинэлэрин Сойуустарын чилиэнэ киинэ, тыйаатыр артыыһа этэ. Билиҥҥи кэмҥэ Варвара Романовна Павлова, 2 Дьөппөн орто оскуолатын физикаҕа учуутала оҕолору, ыччаттары оһуохайга уһуйар, саха култууратын кутун – сүрүн иҥэрэр. ВАрвара Романовна элбэх көлүөрэ оҕону оһуохайга үөрэттэ. Бэл диэтэр физика сокуоннарынан хоһоонноон оһуохайы суруйар, оҕолорго үөрэтэр. Кини үөрэнээччилэрэ улуус, республика оһуохайын күрэҕэр кытталлар. Олортон Лена Шепеткинаны, Анжелика Ефимованы, Виолетта Львованы, Нарыйаана Аввакумованы, Валентин Иванову бэлиэтиэххэ сөп. Билигин ыччат дьоммут  Михаил Адамов, Прасковья Лебедева, Мария Поисеева оһуохай түһүлгэтин тэтимнээх этээччилэрэ буолаллар. Кэлиҥҥи кэмҥэ Василиса Егоровна Романова  кирпииччэлии оһуохайы үөрэппит үөрэҕэр сылдьан, сөбүлээн кирпииччэлии оһуохайы бэйэм сэҥээрдим. Ийэм этэрин өйдөөн кэллим. Икки сыл  улуус ыһыахтарыгар кыттан 2-3 миэстэни ыллым.

Бу сылга «Ситим» КК  «Туллукчаан» оҕо саадыгар тиийэн оһуохай хаамыыларын үөрэттибит. Кирпииччэлии  оһуокайдаан көрдөрдүбүт. Оһуохай үҥкүүтэ утумнанан- ситимнэнэн салҕанан бара турдун. Омоҕой оҕонньор саҕаттан олохтоммут оонньуута, Эллэй эһэбит саҕаттан этиллибит эһиэкэйэ үйэлэртэн үйэлэргэ салҕанан, үгүс дьоҥҥо таптатан тэнийэ- сайда турдун!

Саргылана Федорова