Саха Өрөспүүбүлүкэтин үтүөлээх артыыһа, Саха Өрөспүүбүлүкэтин култууратын туйгуна, Саха Өрөспүүбүлүкэтин А.Е.Кулаковскай аатынан Судаарыстыбаннай бириэмийэтин лауреата, Степан Дмитриевич Петров 80 сааһыгар аналлаах тэрээһиннэр
Ыам ыйын 23 күнүгэр Р.К.Захаров аатынан «Самыртай» түмэлигэр, Саха Өрөспүүбүлүкэтин үтүөлээх артыыһа, Саха Өрөспүүбүлүкэтин култууратын туйгуна, Саха Өрөспүүбүлүкэтин А.Е.Кулаковскай аатынан Судаарыстыбаннай бириэмийэтин лауреата, Хаҥалас улууһун, Күөрдэм нэһилиэгин , Бүлүү улууһун Хаҕын нэһилиэгин бочуоттаах олохтооҕун Степан Дмитриевич Петров ытык 80 сааһыгар анаммыт дуобат, хабылык, Садуоба остуол оонньууларыгар аһаҕас турнир буолан ааста. Саха норуотун биир көһүҥэ көмүс кэриэтэ талааннаах артыыһын, остуол оонньуутун көҕүлээччи үбүлүөйдээх турнирыгар ыаллыы сытар Хачыкаат, Тиит-Эбэ нэһилиэктэриттэн, биир дойдулаахтара Күөрдэмнэр, бииргэ алтыһар доҕотторо кэлэн оонньоон сүргэлэрэ көтөҕүлүннэ. Аймахтара, нэһилиэк дьоно-сэргэтэ истиҥ-амарах эҕэрдэ тыллары анаатылар.
Сарсыарда 10 чаастан ыалдьыттар тоҕуоруһа муһуннулар. «Самыртай» түмэл тэрийээччитин, энтузиаст-краевед Роберт Константинович Захаров мемориальнай дуоскатыгар, олоҕун тиһэх суолугар диэри алтыспыт доҕоро Степан Дмитриевич сибэкки дьөрбөтүн ууран, истиҥ тылларын анаан, кэлбит дьонугар махтал тылларын этэн турнир арыллыыта саҕаланна. Түмэл аартыгын атыллаан киирээти кытта, Матрена Иннокентьевна, Февронья Ивановна алгыстаах алаадьынан, кымыһынан айах тутан ыалдьыттары уруйдуу-айхаллыы көрүстүлэр. Улахан саалаҕа Степан Дмитриевич араас элбэх наҕараадаланарынан, хаартыскаларынан кэрэ көстүүлээх быыстапка оҥоһуллубутун, кэлбит дьон сөҕө-махтайа көрдүлэр. Ол кэннэ, дуобакка күрэхтэһии саҕаланна. Сүрүн судьуйанан биир дойдулаахпыт, элбэх киһини дуобат, саахымат эйгэтигэр сыһыарбыт, үөрэппит, угуйбут киһибит Роман Николаевич Васильев үлэлээтэ.
Күнүс 12 чаастан ордук иһирэхтик үбүлүөйдээх көрсүһүү үөрүүлээх чааһа саҕаланна. Эҕэрдэ суруктары, өйдөбүнньүк бэлэхтэри Күөрдэм баһылыга Петухова О.А, быраттыы Николаевтар аатынан 2 Дьөппөн орто оскуолата (Скрябина Д.И.), Е.В.Туласынова аатынан оҕо уһуйаана (Ю.С. Скрябина) «Ситим» култуура киинэ (Федорова С.С.), Күөрдэмнээҕи норуот тыйаатыра (Александрова О.В.), «Сугулаан» эр дьон ансаамбыла (Свинобоева М.Е.) модельнай библиотека (Лебедева Нь.Р.) дуобат, хабылык хаамыска түмсүүлэрэ, аймахтара үөрүүлээх быһыыга-майгыга туттардылар, сүргэлэрэ көтөҕүллэн туран дохсун ытыс тыаһынан уонна истиҥ амарах тылларынан Степан Дмитриевиһы эҕэрдэлээтилэр. «Сугулаан», «Ситим» ырыа ансаамбыллара ылбаҕай ырыаларын бэлэх ууннулар.
Эбиэт кэннэ, аны дьэ, СаДуоБа оонньуута саҕаланна, ону сэргэ хабылык оонньуута ыытылынна. Турнир түмүгүнэн дуобакка (дьахталлар) l миэстэ Валерия Давыдова Качикат нэһ., ll миэстэ Галина Мордовская, lll миэстэ Мария Протодьяконова (Күөрдэмнэр) Дуобакка (эр дьоҥҥо) l миэстэ Исай Афанасьев Качикат нэһ., ll миэстэ Роман Васильев, lll миэстэ Алексей Артамонов. СаДуоБаҕа l миэстэ Роман Васильев, ll миэстэ Исай Афанасьев, lll миэстэ Сергей Марков Тит эбэ нэһ. 60 мастаах хабылыкка l миэстэ Надежда Платонова, ll миэстэ Полина Петрова, lll миэстэ Иван Алексеев. 30 мастаах хабылыкка l миэстэ Андрей Захаров, ll миэстэ Майя Скрябина, lll миэстэ Февронья Ефремова.
Турнир үөрүүлээх сабыллыытыгар кыайыылаахтары, турниры иилээн-саҕалаан тэрийбит «Самыртай» түмэл салайааччыта Матрена Иннокентьевна Захарова дьиэ кэргэнэ, Роберт Константинович кыыһа Күннэй Робертовна Тимофеева дьиэ кэргэнэ, Степан Дмитриевич аймахтара туруорбут сыаналаах бириистэринэн, мэтээллэринэн, грамоталарынан наҕараадалаатылар. Бар дьоҥҥо анаан аймахтара бэлэмнээбит баай-талым астаах маанылаах остуолга бу турнирга мустубут доҕотторо, аймахтара, ыалдьыттар кэлэн, түмсэн, олус диэн үөрэн-көтөн, ахтылҕаннарын таһааран, дуоһуйа сынньанан, махтал тылларын этэн, үтүөнү баҕаран тарҕастылар.
Хас биирдии эр киһи бэйэтин тула эргимтэлээх буолар. Сорохторго ол эргимтэлэрэ –дьиэ кэргэннэрэ, сорохторго ону таһынан хаан-уруу аймахтара, атас-доҕор дьонноро. Биир эмэ киьиэхэ – бар дьоно, норуота. Биһиги санаабытыгар, биһиги ытыктыыр-убаастыыр киһибит, Степан Дмитриевич кыра нэһилиэкпитигэр оннук үс төгүл эргимтэлээх киһи буолар. Дьиэ кэргэн амарах Аҕата, эһээтэ, айылҕаттан айдарыылаах норуоттан тахсыбыт талааннаах артыыс, чөл олоҕу өрө туппут, остуол оонньууларын пропагандалааччы, көҕүлээччи, нэһилиэк биир бастыҥ ытыктыыр киһитэ, төрөөбүт дойдутун дьиҥнээх патриота — Ыстапаан баай көрүүтүнэн, санаата күүһүнэн, сүбэтинэн-аматынан нэһилиэгин дьонун-сэргэтин тапталын ыллаҕа, элбэх киһини бэйэтин тула түмтэҕэ.
Күндү киһибитигэр, бу курдук эдэрдии дууһалаах, көхтөөх туруктаах, доруобайдык сылдьаргар баҕарабыт. Көрөөччү киэҥ араҥатыгар, эдэриттэн эмэнигэр тиийэ, киинэҕэ уһуллубут чаҕылхай уобарастарын, өр сылларга умнуллубат гына сыанаҕа айбыт оруолларын өрүү дьон эрэ барыта хайгыы, саныы, кэрэхсии, киэн тутта сырыттын. Өссө да «Норуоттан тахсыбыт талааныҥ» умнуллубат уобарастары бэлэхтии турдун!
Иһитиннэриини бэлэмнээтэ Л.Я. Гермогенова аатынан Күөрдэмнээҕи норуот тыйаатырын режиссера Олеся Александрова
