А.М. Сидорова аатынан «Ситим» КК Саргылаах саҥа 2026 сылы «Күлчээнэ. Саҥа дьыллааҕы баал» диэн бэрт сонун театральнай туруоруунан көрүстэ (режиссер Александрова О.В.). Оруолларга Мария Леонтьева – остуоруйаһыт, Күлчээнэ- Олеся Александрова, принц- Юристан Федоров, королева- Ньургуйаана Лебедева, король- Виталий Кириллин, фея- Матрена Захарова, фея көмөлөһөөччүтэ- Айаал Скрябин, маачаха- Саргылана Федорова, кыргыттара- Майя Скрябина, Нария Говорова, сорук-боллур Владик Лебедев, ведьмалар- Людмила Скрябина, Раиса Эверстова, Дьэгэ бааба- Сусанна Филиппова, Кыһыл Бэргэһэчээн- Изабелла Жиркова, Дюймовочка- Майя Свинобоева, Мальвина- Анна Киприянова, ороспуойдар- Октябрина Власенко, Айталина Львова, Дима Самсонов, Марфушенька- Айталина Кузьмина оонньоотулар. Көрөөччүлэр сонун туруорууттан ытыстарын тыаһа хабыллан олордо. Күлүү- үөрүү киэһэтэ буолла. Түмүккэ Тымныы оҕонньор эҕэрдэлээн барыларын биир сомоҕо түмтэ.
2026 сыл Россияҕа норуоттар сомоҕолоһууларын, Республикаҕа Култуура, Хаҥалас улууһугар сомоҕолоһуу уонна түмсүү, нэһилиэккэ Тупсарыы (благоустройства) сылларынан биллэрилиннэ. Онон бары бииргэ буолан эйэлээх олоҕу тутуохха диэн ыҥырыылаах нэһилиэк баһылыга Ольга Аполлоновна Петухова эҕэрдэ тылын тириэртэ. Нэһилиэк ситиһиилэрин билиһиннэрдэ. Быйылгы сылга нэһилиэк олоҕор, социальнай- экономическай сайдыытыгар үтүө кылааттарын киллэрбит дьоммутугар урукку баһылык Александр Николаевич Константиновка, Р.К. Захаров аатынан «Самыртай» түмэл дириэктэригэр Матрена Иннокентьевна Захароваҕа, 2 Дьөппөн нэһилиэгин «Социальнай экономическай сайдыытыгар кылаатын иһин” бэлиэлэри туттартаабыта. Олохтоох администрация ППМИ программатынан сайыҥҥы уу ситимин уонна О.Д. Лебедев аатынан көҥүл тустууга федеральнай таһымнаах тустуу күрэҕин ыытыыга- тэрийиигэ үбүлээһини ылла. «Ситим» КК республикаҕа «Култуура бастыҥ тэрилтэтин»аатын уонна тэрилтэ материальнай – техническэй базатын тупсарыы субсидиятыгар кыайан Култуура министиэристибэтиттэн үбүлэнэр кыаҕы ситистэ.
«Ситим» КК былырыыҥҥы сылтан нэһилиэк култуурунай олоҕор көхтөөхтүк кыттар дьоҥҥо анал премия олохтообута. Былырыын Каролина, Юристан Федоровтарга анаммыта. Быйылгы бириэмийэбитин Л.Я. Гермогенова аатынан норуот тыйаатырын артыыһыгар, билигин Уулаах Ааҥҥа олорор, үлэлиир, улахан дьиэ кэргэн баһылыгар Прокопий Никонтовка анаатыбыт. Прокопий Валерьевич күнүн- дьылын, бириэмэтин аахсыбакка, үлэ чааһын кэннэ тыйаатырыгар кэлэн дьарыктанар. Массыынатынан артыыстарбытын тиэйэ сылдьан тэҥҥэ испэктээхтэргэ кыттар. Оскуола эрдэхтэн тыйаатыр эйгэтигэр таптаан дьарыктанар. Ол сахха «Синяя птица» театральнай көрүүгэ «Бастыҥ оруол» анал ааты ылбыта. Онон тыйаатыр ситиһиилээх үлэтигэр кини кылаата үгүс.
Дьэ ити курдук үтүө ситиһиилэрдээх, элбэх үтүө сонуннаах Үрүҥ Айыы сылын үөрэ- көтө көрүстүбүт. Дьоммут – сэргэбит өрүү доруобай, чэгиэн- чэбдик сылдьыҥ, ситиһии эрэ сиэттистин, дьол- соргу тосхойо туруохтун!
Саргылана Федорова
