1940 сыл, балаҕан ыйа. Саха сириттэн Ленинград куоракка отут икки оҕо А.Н. Островскай аатынан театральнай институкка үөрэнэ барбыта. Кинилэр артыыс буолар баҕалаахтара, олохторун сыананы кытта ситимниир ыра санаалаахтара. “Культура, искусство киинигэр – Ленинград куоракка үөрэнэр дьоллоохпут!” – диэн үөрбүттэрэ-көппүттэрэ. Ону баара… Аҕа дойду Улуу сэриитэ саҕаламмыта. Оҕолор Ленинград блокадатыгар түбэспиттэрэ… Ол туһунан Ахсынньы 6 күнүгэр Л.Я. Гермогенова аатынан Күөрдэмнээҕи норуот тыйаатырын артыыстара, «Кынат» оҕо театральнай устуудьуйа иитиллээчилэрэ “Цветы на хололном снегу» диэн испэктээги «Ситим» култуура киинин сыанатыгар көрдөрдүлэр. Туруорааччы режиссер – Олеся Александрова. Испэктээк Евгения Лепковская уонна Исай Попов ахтыыларыгар олоҕурбут буолан, ураты тыыннаах. Аны туран, артыыстар оонньууллара ордук долгутуулаах. Омуна суох, аҥаардастыы арбаабакка, элбэҕи эппэккэ, кылгастык бэлиэтээтэххэ – артыыстар таһымнара таһыччы буолла. Ол туоһута – толору саала, уйадыйбыт көрөөччүлэр, ытыс хабыллар тыаһа. Сүүстэ истибиттээҕэр биирдэ көрбүт ордук. Биһирээбит бэрт элбэх этэ. Испэктээк бары өттүнэн табыллыбыт диэн сыаналаатахха, сымыйа буолбатах. Оҕолор, артыыстар хас биирдиилэрэ оруолларыгар толору киирэн оонньообуттара тута харахха быраҕыллар. Артыыс оҕолор улахан аҥара аан бастакытын сыанаҕа тахсан оонньоотулар. Бэйэлэрэ да олус астыннылар, сэргээтилэр. Өссө да оонньуохпут, сөбүлээтибит диэн тарҕастылар. Оҕо тыйаатыра ыччаты иитиэ, умсугутуо. Оҕо тыйаатырын Саха сиригэр сайыннарыаҕыҥ, өйүөҕүҥ! Л.Я. Гермогенова аатынан Күөрдэмнээҕи норуот тыйаатырын режиссера Олеся Александрова