Бастакы күҥҥэ сарсыардаттан О.Д. Лебедев аатынан «Дьулуур» спорт саалатыгар, волейбол көрүҥэр дьиҥ тыҥааһыннаах киирсиилэр аастылар. Манна кыттааччылар ох курдук бэлэмнээхтэрин көрдөрдүлэр. Уҥа-хаҥас сүүрэн, мээчиги тиэрэ-таара охсуолаан бэртээхэй оонньуу ааста. Эрийсиилээх киирсии түмүгүнэн бу көрүҥҥэ кыайыылаах үрдүк аатын дьахталларга «Эрчим» (сал. К.П.Федорова),эр дьоҥҥо «Чолбон» (сал. В.И.Михайлова) түөлбэлэр ыллылар. Ону тэҥэ, А.М.Сидорова аатынан «Ситим» култуура киинигэр, дуобат, саахымат, хабылык, хаамыска уонна дартс күрэхтэрэ буоллулар.
Остуол оонньууларыгар саахымакка, дуобакка «Аргыс» түөлбэ бастаан, иннин кимиэхэ да биэрбэтэ. Хабылыкка, хаамыскаҕа «Чолбон» бастаата, иккискэ «Сарыал» (сал. О.В.Александрова), үһүскэ «Аргыс» (сал. А.А.Львова).
Онтон дартс күрэҕэр нэһилиэк тэрилтэлэрин салайааччылара күөн көрүстүлэр.
Күрэх арыллыытын үөрүүлээх быһыыга «Ситим» култуура киинэ ылбаҕай ырыаннан, Бырааттыы Николаевтар ааттарынан орто оскуола үөрэнээччилэрэ тэтимнээх үҥкүүнэн киэргэттилэр.
Иккис күҥҥэ сарсыардаттан мини-футбол күрэҕэр тыҥааһыннаах күөн көрсүү буолла. Хамаандалар олус үчүгэй, сытыы оонньууну көрдөрдүлэр. Күрэх түмүгүнэн «Аргыс» түөлбэ бастаата.
Долгутуулаах, ыһыылаах-хаһыылаах, хатыһыылаах бүтэһик көрүҥ тиийэн кэллэ. Хамаандалар күүстэрин-уохтарын канат тардыһыытыгар көрдөрдүлэр. Хас биирдии кыттааччы санаата күүстээх. Канат тардыһыытыгар техникатын эмиэ сатыахха наада. Биир сутурук курдук хамнаннахха кыайыыны ситиһэҕин. Киирсии түмүгүнэн үһүс миэстэни «Сарыал» түөлбэ, иккис миэстэни «Аргыс», бастакы миэстэни «Чолбон» түөлбэ ылла.
Бары кыайыылаахтар күрэх аайы грамоталарынан уонна мэтээллэринэн наҕараадаланнылар.
Түмүккэ, муҥутуур кыайыылааҕынан «Чолбон» түөлбэ таҕыста. Кыайбыт хамаандаҕа нэһилиэк дьаһалтата, баһылык О.А.Петухова кубок туттарда эҕэрдэ бастыҥын анаата.
Билиҥҥи олоххо түмсүүлээх нэһилиэк кыайыыга кынаттаах буоларын умнумуоҕуҥ, күүсүпүтүн-кыахпытын түмэн, аны кулун тутар ыйга Самыртай хочотун нэһилиэктэрин икки ардыгар ыытыллар «Ректайм» күрэҕэр күөн көрсөргө бэлэм буолуохха!
Балаһаны бэлэмнээтэ Олеся Александрова
