Култуура эйгэтин үлэһитэ диэн барыга бары эргиччи талааннаах, дьону түмэр сатабыллаах, норуот өйүн-санаатын, иитиниитин уонна сайдыытын хааччыйар суолталаах идэ. Кини ырыалыын-үҥкүүлүүн доҕордоһор, дьон сынньалаҥын тэрийэр кэрэ киһи буолар. Нэһилиэнньэни сынньатар, аралдьытар олус элбэх сыраны сылбаны ылар, эрэйэр олус түбүктээх үлэлээх- култуура үлэһитэ диэн ааттанар…
Биһиги нэһилиэкпит ырыаҕа ылламмыт, хоһооҥҥо холбоммут, кэпсээҥҥэ кэпсэммит дириҥ устуоруйалаах, үлэһит дьонноох, ыллам ырыаһыт ыччаттаах, култуура киэҥ эйгэтигэр үрдүк ситиһиилэрдээх, олох хаамыытынан хаалсыбакка түмсүүлээхтик, айымньылаахтык үлэлии турар.
Күөрдэмнэр Култуура сылын өрө көтөҕүллэн үөрүүлээхтик арыйдылар. Үөрүүлээх түһүлгэни түмсүүлээх кэрэ эйгэ култуура үлэһиттэрэ А.М.Сидорова аат. Ситим КК — дириэктэр Саргылана Федорова, Р.К.Захаров аат. Самыртай түмэл — сэбиэдиссэй Матрена Захарова, олохтоох модельнай библиотека — сэбиэдиссэй Ньургуйаана Лебедева , Л.Я.Гермогенова аат Күөрдэмнээҕи норуот тыйаатырын артыыстара, режиссер Олеся Александрова, Е.В.Туласынова аат. «Туллукчаан» оҕо уһуйаана сэбиэдиссэй Юлиана Скрябина, «Холумтан » иистэнньэҥнэр түмсүүлэрэ салайааччы Дария Киприянова, «Сугулаан» эр дьон ансаамбыла салайааччы Майя Свинобоева коллективтара уонна нэһилиэк талааннаахтара кыттыылаах тэрээһин үрдүк таһымҥа ааста. Тэрээһин саҕаланыытыгар култуура үлэһитин сырдатар театрализованнай дьүһүйүү турда , ааспыты ахтан култуура историятын сэгэтэн, бэтэрээн үлэһиттэри ахтан-санаан сырдатан көрдөрдүлэр. Үөрүүлээх сылы арыйарга 2-Дьөппөн нэһилиэгин тыа сирин түөлбэтин баһылыга Ольга Аполлоновна Петухова ыҥырыылаах ыалдтьыттарга, култуура бэтэрээннэригэр махтал сурук туттарда. Ону сэргэ Күөрдэмнээҕи норуот тыйаатырын төрүттээччи Лидия Яковлевна Гермогенова аатынан бириэмийэни дьиэ кэргэнэ,оҕолоро тыйаатыр эдэр артыыһыгар Прокопий Никонтовка туттардылар.
Тэрээһин ыҥырыылаах ыалдьыттарынан биир дойдулаахтарбыт ылбаҕай ырыа аргыстаах аҕам саастаах СӨ култууратын туйгуна Екатерина Попова уонна өр сылларга СӨ телевидениетын уонна радиотын хоругар артыысканан ыллаабыт, «Арчы» норуодунай хорун, «Далбар» норуодунай ансаамбыл ырыаһыта, СӨ доруобуйа харыстабылын туйгуна Наталья Артемьева кэрэ киэһэни киэргэттилэр. Түмүккэ Күөрдэм култууратын үлэһиттэрэ биир тэгил үктэнэн, биир санаанан хардыылаан култуура үлэһиттэригэр анаммыт истиҥ ырыаларын бэлэхтээтилэр.
