Саха Өрөспүүбүлүкэтин үтүөлээх артыыһа  Степан Дмитриевич Петров 80 сааһыгар анаммыт үбүлүөйдээх тэрээһиннэрин чэрчитинэн бу сылга тахсыбыт «Спид Стар» саҥа киинэ ыам ыйын 26 күнүгэр “Ситим” КК сүрэхтэннэ. Киинэ биһирэмэр Алексей Амбросьев- туруорааччы режиссер, Степан Порядин — киинэ генеральнай продюсера, Павел Ченянов- сүрүн оруолу толорооччу, Владимир Тимофеев -толорооччу продюсер уонна Баппалыын оруолун толорбут Степан Петров кытыннылар. Кэлбит ыалдьыттарбыт киинэ айыллыытын ирэ- хоро кэпсээтилэр. Киинэ үс сыллааҕыта уһуллубут.  Дьөһөгөй оҕотугар анаммыт бастакы сахалыы киинэ буолар. Киинэ Саха сирин бастакы тренер- жокейа, Саха АССР ат спордун маастара, СР тыа хаһаайыстыбатын туйгуна, Нам улууһун бочуоттаах олохтооҕо Сергей Ядреев сыралаах үлэтин кэпсиир. Сергей Петрович бу сылга 65 сааһын бэлиэтээбит. Онон Сергей Петрович бу киинэ кини төрөөбүт күнүгэр сүдү бэлэх буолан Намҥа биһирэмнэммит.  Көрөөччү болҕомтотун Саха сиригэр 2400 м. сүүрүүгэ иннин биэрбэтэх, үс төгүллээх Президент бирииһин кыайыылааҕа Спид Стар  сүүрүк ат тутар.

Нэһилиэк баһылыга Ольга Аполлоновна Петухова Степан Петровка Ил Түмэн Бочуоттаах грамотатын туттарда.  Ыалдьыттарга нэһилиэк дьонун аатыттан «Тыа сирин бэлэҕэ» туттарылынна. Заалы толору көрөөччү дьон мустан «Спид Стар» киинэни астына- дуоһуйа көрдүлэр.