Төрөөбүт үөскээбит төрүт сирбит, биир бэйэбит биэс буолан иитиллэн тахсыбыт, уһаарыллыбыт , кииллийбит таптыыр Дьөппөммүтүгэр киһи эрэ олохсуйуон, оҕо-уруу, дьиэ-уот тэринэн олоруон баҕарар дойдута. Биһиги Дьөппөммүт баһаам элбэх баайдаах Нуочахалаах эбэлээх, Харыйалаах, Куудаҥы, Күөл онно, Чаппараайы, Даркылаах диэн ырыаҕа ылланар, хоһооҥҥо хоһуйуллар алаас тыалардаах. Туруук хайа тулалаах, Кыһыл сыыр кытыылаах диэн сибигинэйэн, ытыктаан  ааттанар ытык кэрэ сирдэрдээх. Дьэ, манна төрөөбүт эрэ Бүүтэҥэ үрэх эрийэ- буруйа элэҥниир сүүрүктээх уутуттан күүс-уох ылынар, Элиэнэ Эбэ хотун чэбдик салгынынан сайа тыынан сайдар, Мэндэ, Булуус эбэ ууларыгар мааныланар. Быһатын эттэххэ, күндү таас  буолан чочуллар. Ону туоһулуу бу самаан сайын ситэн- тупсан турар атырдьах ыйыгар -Галина Николаевна уонна Дмитрий Архипович Скрябиннар ыал буолбуттарын үйэ аҥардаах үбүлүөйдэрин бэлиэтииллэр. Көмүс сыбаайба түһүлгэтэ тэриллэр. Скрябиннар биэс бухатыыр уолу төрөтөн, дьоллоох эбээ, эһээ, хос төрөппүт аатын сүктүлэр.Уолаттар атахтарыгар турбут дьон- бастыҥ аҕа, хаһаайын, кэргэн, үлэһит үтүөтэ дэттэрэн, Дьөппөммүт сайдарыгар бэриниилээхтик үлэлии-хамсыы сылдьалларыттан үөрэбит.
Күөрдэммит угут-утах дойду буоларын өссө биир туоһутунан -бу күннэргэ ыал буолбуттарын 60 сылын бэлиэтиир Марковтар дьиэ кэргэттэрэ буолаллар. Бриллиантовай уруу маанылаахтара- ытык кырдьаҕастарбыт Анна Павловна, РФ кооперациятын туйгуна, Владимир Устинович, бэтэрээн , иккиэн Күөрдэм бочуоттаах олохтоохторо. Кыргыттара Наталья, Надежда Владимировналар дьоннорун туйахтарын хатаран бухгалтер, быраас идэлэнэн бар дьоҥҥо сөбүлэттэрэр үтүөкэннээх үлэһиттэр. Оҕо- уруу буолан, олоҕу уһансаллар. Дьэ, кырдьык да киһи үөрүөх сонуна!
Ытык -мааны ыалларбытын Галина Николаевна, Дмитрий Архипович Скрябиннары, Анна Павловна, Владимир Устинович Марковтары аал уоту оттуммут, алаһа дьиэни тэриммит, кыыс-уол оҕонон айхалламмыт, ыал аатын сүкпүт үбүлүөйдээх күҥҥүтүнэн бар дьоҥҥут аатыттан итиитик-истиҥник эҕэрдэлиибит. Дьөппөн сиригэр олохсуйан Ыал, Ийэ, Аҕа диэн ытык өйдөбүллэри өрө тутан, нэһилиэк дьонугар-сэргэтигэр үтүө холобургут, үлэһит- мааны майгыгыт иһин махтанабыт. Сүүс  сааскытыгар дылы  сүһүөххүтүгэр сылдьан кэпсээн кэһиилээх олоруҥ, эдэр дьоҥҥо сүбэһит бастыҥа буолан баай уопуккутун үөрэ-көтө үллэстиҥ,   уйгу-быйаҥ олохтонуҥ, чэгиэн- чэбдик доруобуйаны, уһун дьоллоох олоҕу баҕарабыт.

Эҕэрдэни кытта А.М.Сидорова аатынан «Ситим» КК коллектива