Ырыа ыллыгын арыйан олох киэҥ аартыгар үктэммит ыччаттарбыт үүммүт саҥа дьылга биир дойдуулахтарыгар ырыа кэһиилээх кэлэн, дьоро киэһэ ыыттылар. Саҥа дьыллааҕы киэркэйбит заалга дьон – сэргэ тоҕуоруһан  ыччат оҕолорбут ырыаларын – үҥкүүлэрин көрөөрү эрдэттэн муһуннулар. 2000 сс. «Ситим» КК уонна орто оскуола көҕүлээн нэһилиэк оҕолорун талааннарын көрүү, сайыннарыы күрэҕэ ыытыллара. Араас көрүҥнэргэ уһуйаан, оскуола оҕолоро туруу былдьаһан, икки  күннээх көрүүгэ кыттан “Күөрдэм сулусчааннара” күрэх кыайыылаахтарынан буолаллара. Ол күрэхтэн кынат үүннэрэн оҕолорбут ырыалыын аргыстаһан, сорохтор идэ оҥостон ыллыы- туойа сылдьалларыттан үөрэбит.

Тохсунньу 7 күнүгэр Татьяна Алексеева «Туймаада» судаарыстыбаннай вокальнай ансаамбыл солистката, Лидия Иванова, Сандал Павлов «Күөрдэм сулусчааннара» 2008-2012 сс. Гран при аатын сүкпүт оҕолорбут (билигин ыал ийэлэрэ, аҕалара) ырыа түһүлгэтин бар дьонноругар бэлэхтээтилэр. Устудьуон ыччаттарбыт бу киэһэни үҥкүүнэн киэргэттилэр. Биир дойдулаах дьон буолан, үөрэ- көтө бырааһынньыктааҕы кэнсиэри тэрийистилэр. Көрөөччүлэр дохсун ытыс тыаһынан доҕуһуоллаан,  бэрт истиҥ талаан киэһэтэ буолла.  Аны да ыччат дьоммут сомоҕолоһон маннык кэрэ күннэри бар дьонноругар бэлэхтии, үөрүү түһүлгэтин олохтуу сырыттыннар.

Саргылана Федорова