Күннээх халлаан лоскуйун
Мин илиибэр ылабын,
Сахам ыра санаатын
Түөспэр ыга тутабын.
Айыым сирин үрдүнэн
Алгыс аман күүһүнэн
Киирбэт күнү дьүһүйбүт
Килбиэн кэми өйдүүбүн:
Күнтэн эрэ тэһииннээх
Күн улууһа буоларга
Күннээх былаах ыҥыра
Күлүмүрдээн кэлбитэ
Хара былыт халыйбат,
Хаардаах самыыр баһыйбат
Халлаан унаар урсуннаах
Хаарыан кэмэ күүппүтэ!
Ыра санаа- ытык сирдьит
Ырааҕы да чугаһаппыт,
Көҥүллэммэт Көҥүл кэрэ
Ырыаларын ыллаппыт...
Сайа
Муус устар 25 күнүгэр 2 Дьөппөн орто оскуолатыгар Саха Өрөспүүбүүлүкэтин күнүгэр аналлаах өрөгөйдөөх тэрээһин буолан ааста. Тэрээһини Бырааттыы Николаевтар ааттарынан орто оскуола 5-9 кылааһын үөрэнээччилэрэ “Мин тохтор тойугум чугдаарыа “ диэн уус-уран композициянан арыйдылар. Нэһилиэк баһылыга Ольга Аполлоновна Петухова «Сахабыт сирин түөрт чулуу уолаттара- Президеннэрэ » диэн дакылаат оҥордо. Варвара Романовна Павлова салайааччылаах оһуохайдьыт оҕолор, 5-6 кылаас үөрэнээччилэрэ, республикабыт историятын сырдатар оһуохай түһүлгэтин төрүттээтилэр. Оҕолор оһуохайдара чуор, куоластара этигэн, тыллара- өстөрө уус, хамсаныыларын тэтимэ да сөрү- сөп. Салайааччы физика учуутала Варвара Романовнаҕа, хоһоонньут үөрэнээччилэр салайааччылара — саха тылын , литературатын учуутала Анжелика Николаевна Лебедеваҕа махталбытын тиэрдэбит. Нэһилиэккэ республика күнүн тэрилтэлэр бииргэ бэлиэтииллэрэ үтүө үгэс буолла. Манна үүнэр кэнчээри ыччат патриотическай тыыҥҥа иитиллэр, улахан дьону кытта алтыһар , кэпсэтэр, холобур ыла уһуйуллар. Онтон нэһилиэк дьоно оҕолору кытта аһаҕастык кэпсэтэн, ыйан – кэрдэн биэрэн үтүө эйгэни, сылаас сыһыаны олохтууллар. Быһата эттэххэ түөлбэнэн иитии биир бастыҥ көрүҥэ үөскүүр, эйгэтэ олохсуйар.
Онтон муус устар 27 күнүгэр «Ситим» КК радиобиэриитэ аһаҕас эфиргэ таҕыста. Манна Республика күнүнэн музыкальнай эҕэрдэлэр, төрөөбүт дойдубут туһунан саха бэйиэттэрин хоһоонноро, «Күөрэгэйдээх Күөрдэмнэр» литературнай түмсүү хоһоонньуттарын хоһоонноро ааҕылыннылар. Кэскил Баишев патроиотическай ырыаларынан эҕэрдэлэр көттүлэр.
