Өртөн ыла бэлэмнэнэн
Үөрүү- көтүү аргыстанан
Ыһыах буолар күнэ үүнэн
Ыаллар бары эрдэ туран
Сарсыардаттан үгэс курдук
Саҕаланна ырыа- тойук
Ыһыах – сылга биирдэ буолар омук быһыытынан уратыбытын туоһулуур, култуурабытын көрдөрөр, түмэр- көҕүлүүр соруктаах улахан тэрээһин. Саха киһитэ былыр- былыргыттан бу көххө кыттыһар, тэрийсэр, оһуохайы оройуттан тутар, киэргэлин- симэҕин толору кэтэн дьоҥҥо- сэргэҕэ көрдөрөр, кымыһынан хаттатыгар тиийэ ыалдьыттарын күндүлүүр. Ол сиэри тутуһан симэммит чэчирдэр быыстарынан хааман кэлбит ыалдьыттары 2 Дьөппөн дьаһалтатын үлэһиттэрэ сири иһиккэ быыппах, улахан ураһаҕа кус миинэ бэлэмнээн ыалдьыттары маанылаан айах тутан көрсөллөрүттэн Ыһыах түһүлгэтэ төрүттэннэ.
Ырыаҕа ылланарыныы киэргэйбит паркаҕа сарсыардаттан түптэ буруота унаарда, дойдубут сарсыардааҥҥы сииктээх отун кэһэн оҕо- аймах чуоҕуста. Тамара Тимофеевна Тимофеева арыалдьыттарынаан боҕуруоскай оттоох хонуу устунан хааман киирэн Ыһыах сиэрин – туомун ситэрэн алгыс тылын амалыйда.
Уйгу-быйаҥ ыһыаҕар биир дойдулаахтарбыт СР физическай культураҕа уонна спортка министрэ Леонид Николаевичка Спиридонов, Саха АССР уонна Россия үтүөлээх тренерэ, Аан дойдутааҕы экстра-класс категориялаах судьуйа, Монголия Олимпийскай комитетын кыһыл көмүс орденын хаһаайына, байыаннай дьайыы ветерана, РФ Оборонатын министерствотын 4 мэтээлин хаһаайына Куприянов Александр Аммосович эҕэрдэлээтилэр.
Нэһилиэкпит ситиһиилээх үлэлээх дьонугар бэлиэлэр туттарылыннылар: Роман Афанасьевич Федоров, нэһилиэк бочуоттаах олохтооҕо аатын ылла. Култуура Министерствотыттан Бочуоттаах грамотаны Майя Николаевна Скрябина, «Ситим» КК методиһа уонна Эҕэрдэ суругу Степан Дмитриевич Петров туттулар. Галина Ивановна Ивановаҕа Хаҥалас улууһун култууратын уонна искусствотын сайдыытыгар кылаатын иһин бэлиэ туттарылынна. Елизавета Васильевна Туласынова аатынан сылын аайы “Туллукчаан” оҕо саадын бастыҥ иитээччитигэр туттарыллар Граны быйыл бастыҥ иитээччи Сахая Владимировна Спиридонова, эдэр специалист ылан үөрүүбүт үрдээтэ.
Ыһыах симэҕин «Холумтан» иистэнньэҥнэрин түмсүүтэ ситэрэн араас оҥоһуктарын быыстапката турда. Оһуокайы оройуттан тутан, эдэр- эмэн дьон үгэһи үйэтиттэ. Ыһыах ырыалаах- тойуктаах түһүлгэтин Саха республикатын ыччат уонна дьиэ кэргэн политикатын туйгуна, “Этигэн Хомус” уонна “Үрдэл” музыкальнай бириэмийэлэр хас да төгүллээх кыайылааҕа Арыйаан Свинобоев уонна СӨ култууратын туйгуна, “Үрдэл-2025”музыкальнай бириэмийэ «Бастыҥ дьүрүл» номинация кыайыылааҕа Инна Донская- Дайаана арыйдылар. Төрөөбүт төрүт сирдэригэр ыҥырыылаах ыалдьыт буолан Александра Ивановна, Иван Николаевич Ефремовтар кыыс – дьахтар, уолан киһи сахалыы таҥаһын көрдөрдүлэр. Уран тарбахтаах уус дьоммут “Алаас ахтылҕана” диэн 12 көстүүмтэн турар композицияларын Күөрдэм кэрэ кыргыттара, уоланнара кэтэн хааман көрдөрдүлэр.
Быйылгы ыһыах күрэхтэрэ Кыайыы 80 сылыгар ананна. Үгэс курдук оһуокай биир дойдулаахпыт, Аҕа дойду сэриитин кыттыылааҕа, Албан аат орден кавалера Никита Ильич Захаров- Микииттэ аатынан ыытылынна. Кылаан чыпчаалы Екатерина Лазарева, ХИФУ магистрана ылла. Киниэхэ бирииһи Микииттэ оҕолоро, сиэннэрэ туттардылар. 5-6 кылаас үөрэнээччилэрэ салайааччыларын Варвара Романовна Павлованы кытта биир иллээх дьиэ кэргэн буолан, оһуохай таһаардылар. Любовь Лебедева, Александра Ефремова, Варвара Павлова, Күннэй Винокурова анал аат хаһаайыттара буоллулар. “Саха кэтэһэр ыһыаҕы саҥа таҥас таҥнаары” саха таҥаһын күрэҕэр Крыловтар (Зинаида, Григорий), Захаровтар (Аэлита, Иван), Алина Соловьева, Григорий Гермогенов, Анна Алексеевна Ефимова, Василий Александрович Борисов бастыҥ таҥастарын иһин биһирэннилэр. Ыһыах дьонун мааны таҥаһын иистэнньэҥ талааннаах дьоммут Раиса Эверстова, Ольга Скрябина, Наталия Филиппова сыаналаатылар.
Ыһыах түһүлгэтигэр былыр-былыргыттан саха дьоно бэйэ кыаҕын- күүһүн холонон көрөрө. Бу сиэри тутуһан «Эр Хоһуун» күрэххэ 11 уолан, тэгил дойдуттан тэҥнээхтэр, саар дойдуттан саастаахтар күөн көрүстүлэр. 2 Дьөппөнтөн төрүттээх Дьокуускайдааҕы «Дойдууһа Дархан» түмсүү «Эр Хоһуун» күрэх сүрүн спонсора буолла. Ону тэҥэ биир дойдулаахтарбыт сэрии кыттыылаах аймахтарын, эһээлэрин аатынан сыаналаах бириистэри туруордулар. Хоһууннар үс төгүл үскэ, сүүрүүгэ, оҕунан ытыыга, хапсаҕайга, мас тардыһыытыгар, таас көтөҕүүтүгэр күүстэрин холостулар. Түмүккэ Анатолий Петров кыайыылаах тахсан Лебедевтэр дьиэ кэргэн туруорбут убаһаларынан наҕараадаланна. Бу дьиэ кэргэн аҕаларын, эһээлэрин сэрии бэтэрээнэ Семен Степанович Лебедев уонна үлэ бэтэрээнэ эдьиийдэрин Ирина Степановна Лебедева ааттарын үйэтиттилэр. 2 миэстэ- Михаил Скрябин буолла, сэрии кыттыылааҕа Алексей Саввич Марков аатынан бирииһи оҕолоро, сиэннэрэ туттардылар. Үһүс миэстэни Алексей Соловьев ылла уонна тыыл, үлэ бэтэрээнэ Филипп Егорович Скрябин аатынан бирииһи оҕолоро, сиэннэрэ анаатылар. Сивцев Прокопий төрдүс буолла, Лебедев А.С уонна Попова С.С. дьиэ кэргэттэрэ туруорбут бириистэрин тутта. Бэһис бочуоттаах миэстэҕэ Константин Николаев таҕыста уонна Киприянов Егор Николаевич 1, Аҕа дойду сэриитин кыттыылааҕа аатынан бирииһи оҕолоро, сиэннэрэ уу харчынан анаатылар. Эгил- тэгил киирсибит уолаттарбытыгар биир дойдулаахтарбыт анал бириистэрин туттардылар. Ол курдук Аҕа дойду сэриитин кыттыылааҕа Н.Ф. Спиридонов аатынан бирииһи оҕолоро, сиэннэрэ- Айаан Филипповка, Афганистан сэриитин кыттыылааҕа, Хаҥалас хапсаҕайа- 2010 сс. бэтэрээннэргэ чемпиона И.П. Федоров аатынан бирииһи оҕолоро Александр Алексеевка, Аҕа дойду сэриитин кыттыылааҕа Н.Е.Климентов аатынан бирииһи оҕолоро, сиэннэрэ Карамзин Викторга туттардылар. Ону тэҥэ бары бөҕөстөргө көхтөөх кыттыыларын иһин анал бириистэрин Варламов А.А., Борисов В.А., Леонтьев В.П., Скрябиннар, Алексеевтар, Прокопьевтар, Константиновтар дьиэ кэргэттэрэ, 2 Дьөппөн оскуолатын 2010 с выпуһа, А.М. Сидорова аатынан «Ситим» КК туттардылар.
Ыһыах мааны түһүлгэтин, оонньуутун- көрүн, аһын- үөлүн тэрийсибит биир дойдулаахтарбытыгар, спонсордарбытыгар, урбаанньыттарга, Александра, Иван Ефремовтарга, алгыс түһүлгэтигэр кыттыбыт далбар хотуттарга, оҕолорбутугар, алгысчыт Тамара Тимофеевна Тимофееваҕа, сиэр- туом силигин ситэрэр түһүмэх кыттыылаахтарыгар, ырыалаах – оонньуулаах түһүлгэ бары кыттыылаахтарыгар, тэрийсээччилэригэр, тэрилтэ салайааччыларыгар, спортивнай күрэхтэри иилээн- саҕалаан ыыппыт Иван Алексеевич Алексеевка, Николай Николаевич Платоновка, иистэнньэҥ дьоммутугар, оонньууларга көхтөөхтүк кыттыбыт бар дьоммутугар, ыһыах аһын- үөлүн хото тэрийсибит хорчуоппалаах дьиэ кэргэттэргэ, волонтер оҕолорбутугар, үөрүүнү- көтүүнү үллэстибит, дьон сүргэтин көтөхпүт дьоммутугар, күрэхтэри дьүүллээбит жюриларга махтанабыт.
Аны да сылларга бары бииргэ буолан түмсүүлээхтик үлэлиэҕиҥ- тэриниэҕиҥ диэн ыҥырабыт.
«Ситим» КК дириэктэрэ Саргылана Федорова
