Крыловтар дьиэ кэргэн Зинаида Николаевна, Григорий Семенович бу сааскы мааны күннэргэ ыал буолан, оҕо төрөтөн, дьиэ — уот тэринэн олорбуттара  үйэ аҥара буолбутун бэлиэтээтилэр. Зинаида Николаевна Күөрдэмҥэ бастыҥ ырыаһыт, ыһыаҕы арыйааччы кылыһахтаах тойуксут, онтон Григорий Семенович тарбаҕыттан баянын араарбат музыкант бэрдэ, баянист бастыҥа. Крыловтар дьиэ кэргэн Күөрдэм сирин тутаах үлэһиттэрэ. Совхоз эрдэҕиттэн үлэни өрө тутан, туохтан да чаҕыйбат, сарсыарда эрдэлээн турар, киэһэ дьон кэннэ үлэттэн тардыллан кэлэр  үлэһит ыаллар. Зинаида Николаевна, Григорий Семенович түөрт оҕо,  уон үс сиэн, икки хос сиэн буолан Күөрдэмҥэ кэҥээн тэнийэн олорор ыаллар. Сүөһү-ас көрөн оҕолоругар, сиэннэригэр халыҥ хахха, суон дурда, үтүө холобур буолан олороллор. Мааны күннэринэн  олохтоохтор ааттарыттан эҕэрдэлиибит. Баҕа санаа бастыҥын, үтүө санаа үтүмэнин аныыбыт. Таарыйбыккыт тупса, туппуккут туругура, үүннэрбиккит үөскүү турдун. Дьолу- соргуну, доруобуйаны баҕарабыт. Оҕолоргут сиэннэргит сылаас тапталларынан угуттанан өр сылларга үөрэ- көтө , олоҕу уһанса олоруҥ!