Киһи кэрэттэн кэрэни сөбүлүүр, таптыыр. Саха омук тарбаҕар талааннаах, ураты кэрэни айан таһаарар, көрөр, кэрэхсиир дьоҕурдаах омук буолар.    Кулун тутар 20 күнүгэр «Ситим» култуура киинигэр “Кэрэ сэбэрэ – кэрэ аҥар сөбүлүүр дьарыга” диэн дефиле киэһэтэ буолан ааста.

 Мааныга да, күннээҕи да олоххо аналлаах таҥастары, көмүс тарбахтаахтар баай фантазияларыгар олоҕуран айан таһаарааччылар Күөрдэм нэһилиэгиттэн Саргылана Борисова, Раиса Эверстова, Варвара Константинова, Покровскай куораттан Светлана Мальцева,  Александра Петрова, Дьокуускайтан Анна Аргунова,  «Кыталыына» кэрэ аҥар түмсүүтэ бу  киэһэ ону бигэргэттэ. Силиги ситэрэн киһи хараҕын үөрдэр аныгы сахалыы киэргэллэри, оҕуруонан араас ньыманы баһылаабыт, кэрэ симэхтэри айааччылар Юлия Прокопьева, Олеся Александрова уонна кэрэ  түгэни үйэтитээччи, айылҕа уонна олох түгэнин «тохтотор» хаартыскаҕа түһэрээччи Каролина Федорова ураты көрүүлээх кэрэ аҥардар ыалдьыттаатылар.  Илиилэригэр талба талааннаах, көмүс тарбахтаах кэрэ мааны далбар хотуттар  тус дьарыктарын   көрөөччүлэргэ билиһиннэрдилэр.

Бу киэһэ кэлбит көрөөччү хас биирдии кыттааччыны ытыс күүстээх тыаһынан көрүстэ. Бииртэн биир сонун көстүү, муода сурунаалын кылбачыгас сирэйинии, арыллан истэ. Кэрэ муусука доҕуһуолун кытта «Ситим» вокальнай ансаамбыл ырыалара бу  киэһэни  өссө ис иэйиилээн, дириҥ ис хоһоонноон ситэрдилэр.

 Дойдубут мааны далбар хотуттара, айар талааҥҥыт арылла истин, талба буоллун! Сытыы хараххыт сыппаабатын, имигэс тарбаххыт сылайбатын, айар дьоҕургут уҕараабатын, кэрэни кэрэхсииргит киэркэйэ турдун, дьол – соргу эҥээрдэстин, сахалыы таҥастаах, симэхтээх элбии турдун!

 Олеся Александрова