Ыам ыйын  17 күнүгэр Хачыкаакка саха суругунан литературата төрүттэммитэ 125 сылыгар, Кыайыы 80 сылыгар, Саха сиригэр ньургуһун күнүгэр анаммыт  «Кэм  кэрдии кэрэкэ эргиирэ» диэн  хоһоон түһүлгэтэ ыытылынна. Түһүлгэҕэ Хачыкаат уонна Күөрдэм хоһоонньуттара, уус-уран литератураны таптааччылар, поэзияны сэҥээрээччилэр  көрсөн сонун- нуомас атастастылар. Поэзия киэһэтин олохтоох библиотекарь Светлана Васильевна Архипова иилээн- саҕалаан ыытта.

Бастакы түһүмэх айар илбис аҕата Алексей Елисеевич Кулаковскай- Өксөкүлээх Өлөксөй литературнай нэһилиэстибэтигэр ананна. Суруйааччы Хачыкаакка олорон суруйбут айымньыларын «Сыһыы кустуктара» литературнай түмсүү уонна оскуола үөрэнээччилэрэ ааҕан иһитиннэрдилэр. Светлана Васильевна поэзия күнүгэр анаан бэлэмнээбит Кулаковскай уонна Барааскап доҕордоһууларын туһунан слайдарынан кэпсээнин кэрэхсии иһиттибит.  Бу кэннэ ырыа- тойук тоҕойо- Хачыкаат ырыаһыттара, үҥкүүһүттэрэ кэрэкэ ырыанан- поэзия түһүлгэтин киэргэттилэр. Кыайыы кынаттаах хоһооннорунан  квест-оонньуу ыытылынна. Буойун суруйааччылар хоһоонноро Иннокентий Артамонов, Дьуон Дьаҥылы, Сергей Васильев, Петр Тобуруокап, ону тэҥэ Сэмэн Дайыылап, Пантелеймон Тулааһынап айымньыларын хоһоонньуттар холобурдаан көрдүлэр, көтүтүллүбүт хоһоон тылын таба таайарга холоннулар. Үһүс түһүмэх- Ньургуһуннар кэрэлэрин – диэн  авторскай хоһоон түһүлгэтигэр хоһоонньуттар саас аайы тоҥ буору хорсуннук тобулу үүнэн тахсар, бар дьон үөрүүтүн үксэтэр маҥнайгы сибэкки ньургуһун туһунан уустаан-ураннаан айбыт хоһооннорун бар дьон иннигэр ааҕан иһитиннэрдилэр. Итии чэй иһэ – иһэ айымньыларбыт, кинигэлэрбит туһунан ирэ- хоро кэпсэтэн тарҕастыбыт.

«Сыһыы кустуга» литературнай түмсүү кыттыылаахтарыгар, олохтоох библиотекарь Светлана Васильевнаҕа, «Сарыал» КК үлэһиттэригэр хоһоон –ырыа хонуутугар ыалдьыттаппыттарыгар махтанабыт.