Хоһоонунан хоһуйар, холобурдуур дьон үксээн иһэллэрэ киһини үөрдэр. Маассабай хоһооннооһун 2014 с. Литература сыла биллэриллибититтэн саҕаламмыта диэн үгүс хоһоонньуттар бэлиэтииллэр. Куйаар ситимэ үөдүйэн  ситим хоһоонньуттара да үксээбиттэрэ. Онтон хоһоону дорҕоонноохтук ааҕыы бука пандемия кэмигэр күүһүрбүтэ быһыылааҕа. Ол аата киһи хаайыы-бобуу кэмигэр этиниэн, таайтаран да буоллар хоһоонунан тириэрдиэн баҕарар санаата күүһүрэр. Дьэ, маннык тууйуллар-хаайтарар кэмҥэ хоһоон терапията саамай көмөлөөх буолар. Хоһоон көннөрү тыл наардааһына эрэ буолбатах.Бу сүрэх ырыата, сороҕор дууһа кыланыыта. Оттон хоһоону ааҕыы бу эмиэ туспа хайысха. Уйулҕа үөрэҕинэн хоһоону ааҕыы терапия биир көрүҥэ. Хоһоон суруйар киһи быһыытынан, бу биир үтүө көрүҥү психологтар тула ырытыһыахха диэн санааттан «Психологическай митап»  тэрийэн ыыттым. Манна бэйэбит, психологтар тула, сабыс саҥа  тахсыбыт » Хоһоон кынатыгар уйдаран » хоһоон психотерапията диэн кинигэм 4 эмоцияҕа араарыллан суруллубут хоһооннорбун аахтыбыт. Ырыттыбыт, кэпсэттибит. Долгуйан, ытамньыйан да ыллыбыт. Кырдьык да тыл тэтимэ, тыл сабыдыала күүстээҕин билиннибит. Салгыы республикаҕа биллэр психолог Нина Слободчикова, оскуола психолога Яна Иванова, реабилитационнай киин психолога Ульяна Винокурова үлэлэрин уопутуттан үллэһиннилэр. Олус астына дуоһуйан араас эрчиллиилэри оҥордубут. Эйгэни кытта үлэлиир дьоҥҥо туһалаах көрсүһүү буолан ааста.

Саргылана Федорова