Муус устар 12 күнүгэр Нөмүгү нэһилиэгин «Түһүлгэ» култуура киинигэр, Хаҥалас улууһун үс тыйаатыра «народнай» аатын көмүскүүр түһүлгэтэ буолан ааста.
Сандаарар уоттардаах сценаҕа умнуллубат оруоллары айааччылар, кэрэни кэрэхсиир, саҥаны айар- тутар норуоттан тахсыбыт талааннар биир түһүлгэҕэ муһуннулар.
Аттестационнай хамыһыйа сүрүн бэрэсэдээтэлэ Саха сирин норуот тыййаатырдарын куратора, Өрөспүүбүлүкэтээҕи норуот айымньытын киинин уус- уран салайааччыта, СР култууратын туйгуна Захаров Алексей Константинович, Өрөспүүбүлүкэтээҥи норуот айымньытын киинин аналитика уонна методика отделын сүрүннүүр специалиһа СӨ култууратын туйгуна Васильева Александра Васильевна уонна Хаҥалас улууһун «Арчы дьиэтэ » норуот айымньытын киинин уус-уран салайааччыта Гаврильева Матрена Егоровна.
Бастакыннан, Л.Я. Гермогенова аатынан Күөрдэмнээҕи норуот тыйаатыра, Иван Егоров -Сүгэһэрдээх поэматынан «Ийэ сүрэҕэ» сэттэ оонньуулаах драманы көрдөрдүбүт.Дьиҥнээх  олоххо олоро сылдьыбыт, Февронья Малгина биэс уолун бэһиэннэрин Иккис Аан дойду сэриитигэр сүтэрбит саха ийэтин кэпсээнигэр олоҕуран турбут испэктээк, дьон-сэргэ кэрэхсэбилин ылла. Артыыстар итэҕэтиилээхтик оонньоон, көрөөччүлэр харах уута суох көрбөтүлэр. Туруорааччы режиссер — Олеся Александрова.
Иккиһинэн,  С.П. Федотов аатынан Нөмүгү норуот тыйаатыра Алексей Ооржак Хертек Шеериин Ол поэмаларынан, Кирилл Семенов тылбааһыгар «Уу-чукучук кулунчук» драманы уонна Мария Герасимова -Сэҥээрэ » Дьахтар сэбиэтин мунньаҕыттан» аймньытыгар олоҕуран биир көстүүлээх кэмиэдьийэни көрдөрдө. Туруорааччы режиссер — Алена Филиппова. Үсүһүнэн, Өктөмнөөҕү норуот тыйаатыра Степан Ефремов «Ини-бии» драматын туруорда. Туруорааччы режиссер — Зоя Аржакова.
Ити курдук, Хаҥалас норуот тыйаатырдара аттестационнай хамыһыйа иннигэр үлэлэрин көмүскээтилэр. Тыйаатырдар таһымнара сылтан сыл аайы тупсан иһэрэ, артыыстар оонньооһуннара, режиссердар туруоруулара олус кэрэхсэбиллээх диэн бэлиэтиэххэ наада.
Түмүккэ, бииргэ алтыһар коллегаларбар баҕарыам этэ, сыралаах үлэҕит уһуга көстүбэт, муҥура биллибэт киэҥ далайыгар олохтоох оҥочоҕут долгуннары быһан эрэллээхтик уһуннун, норуоттан тахсар талааннар үксүү турдуннар, саҥа туруоруулар элбии турдуннар. Кыайыы, ситиһии, өрөгөй үктэллээх сылдьыҥ. Тыйаатыргыт аатын ааттата, сураҕырда туруҥ!

Балаһаны бэлэмнээтэ: Күөрдэмнээҥи норуот тыйаатырын режиссера Олеся Александрова