Антонина Колесова

АТ МЫРААН ҮРДҮТТЭН КӨСТҮҮ

Сарсыарда сарыаллыын тураммын
Ат мыраан үрдүгэр ыттабын:
Дьэр сирэ, хонуута дьэргэйэр,
Ытыска уурбуттуу нэлэйэр.

Санаабар мохсоҕол буоламмын
Халлааҥҥа чыһыыра көтөбүн,
Ходуһа күөллэрин көрөбүн
Тэлээрэ эргийэн кэлэбин.

Эркээни хочотун үрдүнэн
Наҕыллык анаара дайабын,
Сүүс араас өҥүнэн тырымнаан
Хочобут арыллар сандааран.

Чаҕылхай тыҥкынас халлааным
Чуумпура иһийбит айылҕам,
Наҕыллык мэччийэр муостаахтар,
Оргууйдук хамсанар сыспайдар.

Ат мыраан үрдүттэн көстөллөр
Быыкайкаан оонньуурдар буоланнар.
Илиибин уунабын ыламмын
Бу оонньуох баҕаҕа куустаран.

Күһүн бөлкөй талахтарга 
Сэбирдэх кутаатын умаппыт.
Ой бэстэргэ, ойуурдарга
Оһуорун ойуутун ыспыт.

Дойдум дьикти айылҕатын
Тылбынан сатаан эппэппин.
Сирин, хонуутун, халлаанын
Кэрэтин кыайан туойбаппын.

Тыллар тиһиллэн испэттэр
Хоһуйуум оҕуруо сабыгар,
Арай дууһам дьиҥ иһигэр
Сөҕүмэр көстүүнү иҥэрэр. 

«Дьулуур» эдэр саас эҕэрдэ кэнсиэрэ

Бу күннэргэ Ат мырааннаах, Куудук сайылыктаах, дьаам сыдьааннара- Дьэр нэһилиэгин эдэр ыччата улуус нэһилиэктэринэн сылдьан гастрольнай программатын көрдөрдө. Билигин уус уран самодеятелностька эдэр ыччаты көҕүлүүр уустуктардаах. Оттон нэһилиэк ыччата мустан гастроллуура хайҕаллаах эрэ буолар. Уулаах Аан ыччатын үҥкүүтэ элбэҕэ, таҥас- сап дьэрэкээнэ, ырыаһыттарын куолаһа мааныта, сценкаларын сонуна көрөөччү кутун – сүрүн тутта.  Үүнэр ыччаппыт сатабыла барыбытын кэрэхсэттэ. Бу курдук ыччаппыт инники күөҥҥэ  олоҕу айа- тута сырыттыннар. Дьоллоох – соргулаах ыал ийэтэ- аҕата буолан, үөрүү- көтүү үктэллээх буоллуннар.