Олунньу 13 күнүгэр Дьокуускайдааҕы биир дойдулаахтарбыт түмсүүтүн салайааччыта, тумус туттар киһибит, Максим Аммосович Куприянов көҕүлээһининэн Дьокуускай куорат Арчы Дьиэтигэр Афанасий Семёнович Фёдоров — Охонооһойу кытта көрүстүбүт.
Афанасий Семёнович 1975 сыл-ха тыйаатыр артыыстарын кытта 2 Дьөппөҥҥө гостуруолга кэлэ сылдьан, нэһилиэк ыһыаҕар ыалдьыттаабыт уонна Дьөппөн дьонун оһуохайын көрөн, бэркэ диэн дьиктиргээбитин, биһирээбитин туһунан кэпсээтэ. Ону сэргэ, киниэхэ үөрэххэ уһуйулла сылдьар дьонун кытта Дьөппөҥҥө көрбүт оһуохайын хайдах өйдүүрүнэн хаамтаран, этиттэрэн көрдөрдө.
Бу көрсүһүүнү суруйааччы, драматург, киносценарист Семён Ермолаев — Сиэн Өкөр видеокамераҕа уһулла. Афанасий Семёновичка уонна Арчы Дьиэтин салайааччытыгар Валентина Бочонинаҕа нэһилиэкпит кинигэтин бэлэх ууннубут.
Ити курдук, төрөөбүт тыл, сурук — бичик күнүгэр, бэрт дьоһун, кэнэҕэс кэскиллээх көрсүһүү буолан ааста.
???????