Күөрдэмнээҕи А.М. Сидорова аатынан “Ситим” КК Саҥа дьылы көрсө оҕолор ааҕалларыгар сөптөөх хоһоон айыытын күрэҕин биллэрбитэ. Нам, Уус Алдан, Ньурба, Таатта, Халыма, Өлүөхүмэ, Горнай, Хаҥалас, Мэҥэ Хаҥалас улуустарыттан балай эмэ элбэх үлэ киирдэ. Сорох хоһоон оҕо ааҕарыгар учуоттамматах диэн дьүүллүүр сүбэ сыанабыл быста. Түмүккэ маннык сүбэҕэ кэллэ.
1 Үрдэл- Ылдьаа Хоточчу, Хаҥалас улууһа, Хоточчу
2 Үрдэл- Уран Күннэй Саргын кыыһа, Нам улууһа, Нам сэлиэнньэтэ
3 Үрдэл- Кононова Варвара Даниловна- Балбаара Хорула, Ньурба улууһа, Хорула нэһилиэгэ
*** Кулунчук ***
Дьөһөгөйүм оҕото
Дьэргэстэнэр кулунчук,
Тыбыырарын оҕото
Тосполдьуйар тоспоончук.
Чөрөгөркөөн кулгаахтаах,
Чиргэл,чирэс көрүҥнээх,
Чоҕулукаан харахтаах,
Чэмэликээн бэйэлээх.
Сүүрэн-көтөн быыралаан
Сындыыс,быһый атахтан,
Кыыралдьыйа көтөҥҥүн
Кылбар кыайыы кынаттан!
Дьөһөгөйүм оҕото
Дьэргэстэнэр кулунчук,
Тыбыырарын оҕото
Тосполдьуйар тоспоончук.
Чөрөгөркөөн кулгаахтаах,
Чиргэл,чирэс көрүҥнээх,
Чоҕулукаан харахтаах,
Чэмэликээн бэйэлээх.
Сүүрэн-көтөн быыралаан
Сындыыс,быһый атахтан,
Кыыралдьыйа көтөҥҥүн
Кылбар кыайыы кынаттан!
Ылдьаа Хоточчу.
Ылдьаа Хоточчу.
2) Уран Күннэй Саргын кыыһа Нам улууһун Нам сэлиэнньэтэ
*** Кулунчук ***
Туйахтара тоһургуур,
Тойтоһуйа ойуолуур,
Кулунчукпут мэниктиир,
Кутуруга тэйбэҥниир.
Дьөһөгөйбүт оҕото
Дьоруолатар кыбыыга,
Сыспай сиэллээх сорҕото
Сылдьар эбит сыһыыга.
Бойбоһуйа, күөлэһийэ,
Кырдал устун тэлэһийэ
Бороохтуйбут уу-чукучук,
Кыра-мааны кулунчук.
Киһи эрэ таптыахтыы
Кини эмиэ атаахтыыр,
Тугу эрэ аптыахтыы
Тула хааман алтахтыыр.
Онтон сүүрэр ийэтигэр,
Олус сылаас эйгэтигэр
Сэниэ ылар сүмэтиттэн,
Ситэр, тупсар илгэтиттэн.
Саргын кыыһа Күннэй
3) Кононова Варвара Даниловна Балбаара Хорула, Ньурба улууһа, Хорула нэһилиэгэ
*** Кулунчук ***
Кулун тутарга,
Кырыа хаарга,
Күнү көрдө-
Кулун кэллэ!
Ситим утах,
Сылгы төрдө,
Саҥа олох
Саҕаланна.
Күүстээх тыаллаах,
Күдэриктээх
Тибии күҥҥэ
Төрөөтө.
Титирэстээн
Тура түһэн,
Хардыы эбэ
Хааман көрдө.
Иҥэрсийэр
Ийэ диэки
Иннин хоту
Иҥнэлдьийэр.
Эмиий эмэн
Эрчимирдэ,
Сэниэ киирэн
Сиэлэ сүүрдэ.
👏👏👏👍👍👍