Кулун тутар 7 күнүгэр 2 Дьөппөн нэһилиэгэр дьоһун бэлиэ тэрээһин буолан ааста. Улуу Кыайыы 75 сылыгар анаммыт «Кыайыы Салюта» олохтоох худуоһунньуктар үлэлэрин быыстапкатын сүрэхтэниитэ уонна нэһилиэк эр дьонун эҕэрдэ кэнсиэрэ үгүс дьону түмтэ. Бу дьоһун бэлиэ тэрээһини көҕүлээбит, үбүлээбит биир дойдулаахтарбыт үтүө киэһэ ыалдьыттара буоллулар — үлэ бэтэрээнэ, билиҥҥи кэмҥэ профессиональнай үөрэхтээһин маастара, көҥүл худуоһунньук Далбараева Лариса Ивановна, үлэ бэтэрээнэ, «Учууталлар учууталлара», «Методист Якутии» бэлиэлээх бэтэрээн учуутал Алексеева Лидия Степановна.
Быыстапка дьүүллүүр сүбэтигэр үлэлээтилэр — Россиятааҕы налоговай сулууспа туйгуна, СР үтүөлээх экономиһа, Хаҥалас улууһун, Улахан Аан нэһилиэгин бочуоттаах олохтооҕо — Иринеева Ирина Иннокентьевна, нэһилиэкпит үгүс культурнай тэрээһиннэрин ыалдьыта, Россия айар сойууһун чилиэнэ, улуустааҕы култуура салалтатын мэтэдииһэ, худуоһунньук, СР култууратын туйгуна — Семёнова Галина Дмитриевна.
Бу дьоро киэһэ ойуулуур — дьүһүннүүр талааннаах биир дойдулаахтарбыт Аҕа дойду Улуу сэриитигэр анаммыт үлэлэрин уонна көҥүл тиэмэҕэ хартыыналарын туруордулар. Ол курдук, Раиса Эверстова, Ольга Скрябина, Ольга Лебедева, Февронья Ефремова, Екатерина Дмитриева, Матрена Исакова, Владимир Александров, Александр Константинов, Тамара Адамова кыттыыны ыллылар.
Эр дьон эҕэрдэ кэнсиэрдэрин кэмигэр дьууллуур сүбэ быһаарыытынан кыайыылаахтар ааттара ааттаннылар:
Гран При — Дмитриева Екатерина Николаевна 10 тыһ. солк. харчынан бириэмийэ тутта.
1 миэстэ — Владимир Иванович Александров (5 тыһ. солк.)
2 миэстэ — Ольга Афанасьевна Скрябина (3 тыһ. солк)
3 миэстэ — Февронья Ивановна Ефремова (2 тыһ. солк) бириэмийэ тутан өрөгөйдөөтүлэр.
Маннык хабааннаах быыстапка — күрэх биһи нэһилиэккэ иккис төгүлүн тэриллэр.
Биир дойдулаахтарбытыгар Лариса Ивановнаҕа, Лидия Степановнаҕа, музей дьиэ үлэһитигэр Матрена Иннокентьевнаҕа уонна айар — тутар дьоҕурдаах талааннаах дьоммут үлэлэрин сыаналаабыт күндү ыалдьыттарбытыгар Ирина Иннокентьевнаҕа, Галина Дмитриевнаҕа улахан махталбытын тиэрдэбит!
