Ахсынньы 18 күнүгэр Л.Я. Гермогенова аатынан Күөрдэмнээҕи норуот тыйаатырын артыыстара, «Кынат» оҕо театральнай устуудьуйа иитиллээчилэрэ “Цветы на холодном снегу» испэктээги Покровскай куорат, «Саргы түһүлгэтэ» улахан уораҕайыгар «Мы с вами» #своих не бросаем диэн анал байыаннай дьайыыга сылдьар биир дойдулаахтарбытыгар аналлаах, аһымал кэнсиэркэ ситиһиилээхтик кыайа тута көрдөрдүлэр.
Бу, саҥардыы тыыллан, саҥардыы олох олорон эрэр ыччаттар, тылланан саа-саадах тутан фроҥҥа барбыт аҕыйах уолтан уратылара — сибэкки курдук кэрэ кыргыттар, 18-тарын да туола илик сытыы-хотуу уолаттар, бука бары Ленинград блокадатыгар түбэспиттэрэ, аччыктаабыттара, тымныы хаарга түспүт кэрэ сибэккилэр, тоҥмуттара-хаппыттара, өлбүттэрэ-сүппүттэрэ, эрэйи-кыһалҕаны түөстэринэн тэлбиттэрэ. Баара-суоҕа сэттиэйэх эрэ буолан, араас моһоллору туораан, ахтылҕаннаах төрөөбүт дойдуларыгар — Сахаларын сиригэр эргиллэн кэлбиттэрэ.
Култуура киинин саалата «лыык» курдук көрөөччүнэн туолла. Дьон норуот сүрэҕэр номох буолан хаалбыт түбэлтэни, испэктээк нөҥүө биир тыынынан, харах уулаах иһийэн олорон сэргээн көрдө-иһиттэ.
Тыйаатыр артыыстара, оҕолорбут улахан уоттаах-күөстээх сыанаҕа оонньоон сүргэлэрэ көтөҕүлүннэ, «браво, бис» күүстээх ытыс тыаһа ыланнар үөрдүлэр, долгуйдулар.
Көрөөччүлэр испэктээк кэннэ олус сэргээбиттэрин, долгуйа көрбүттэрин биллэрдилэр.
Манан, тыйаатыр коллектива Кыайыы 80 сылыгар аналлаах биир сыллаах үлэтин түмүктүүр, аны кэлэр сыл өссө атын интириэһинэй туруоруулары бэлэмниэхпит, истиҥ истээччилэрбитигэр көрдөрүөхпүт.
Л.Я. Гермогенова аатынан Күөрдэмнээҕи норуот тыйаатырын режиссера Олеся Александрова
