Сарсыардаттан чаҕылыйан Аламай күммүт, үүммүт күнү уруйдаан сылааһынан угуттаата. Алтынньы 3 күнүгэр Тиит — Эбэ култуура дьиэтигэр икки Дьөппөн нэһилиэгин холбоһуктаах, аҕам саастаах, 55+ саастарыттан үөһэ, дьоммутугар анаан «Чөл олох — олохпут оҥкула» диэн бэтэрээннэр сэбиэттэрэ, икки кулууп үлэһиттэрэ көҕүлээһиннэринэн тэрээһин ыытылынна. Сарсыарда 10 чаастан сүргэлэрэ көтөҕүллүбүт, сылааһынан сыдьаайар биир дойдулаахтарбыт, ыалдьыттарбыт мустан тэрээһиммит сахалыы алгыһынан арылынна. Алгыһы оҥордо Татьяна Егоровна Сивцева Сайнаара, Вера Михайловна Ильина ыалдьыттарбытын арыылаах алаадьынан, саламаатынан күндүлээтэ. Кулууп үлэһиттэрэ ылба5ай ырыа кэһиилэрэ дьиэрэйдэ. Бу күн икки хамаанда илин кэлин түсүһэн коронхол, сыал ытыы, дартс, дуобат, саахымат, хабылык, хаамыска, көрдөөх стартар, чэбдигирдэр хамсаныылаах флеш моб үҥкүү, бөлөҕүнэн ырыа толоруутугар күрэхтэстилэр. Быыһыгар балыыһабыт эмчиттэрэ кэлэн дьоммут давлениеларын кээмэйдээтилэр, сүбэлэри биэрдилэр. Бары бииргэ остуол тула олорон, кэпсэтэн, сонуннарын үллэстэн эбиэттээтибит. Минньигэс астаах кыргыттарбытыгар Надялаах, Луиза5а махталбытын тиэрдэбит. Хамаанданнан ыытыллыбыт күрэхтэрбит түмүгүнэн 2 Дьөппөн «Дьулуур» хамаандата кыайыылааҕынан таҕыстылар. Эһиил маннык көрсүһүүнү 2 Дьөппөҥҥө, тэрээһин кыттыылаахтара, тэрийээччилэр салҕыы ыытарга сүбэлэстибит. Онон илин эҥэр Самыртайдар эһиил өссө элбээн, нэһилиэктэри барыларын хабан, тэрээһиммит сайда турдун. Күндү дьоммутугар, бэтэрээннэр сэбиэттэрин салайааччыларыгар Алевтина Петровна Скрябинаҕа, Николай Николаевич Ефимовка махталбытын тиэрдэбит баҕарабыт чэгиэн доруобуйаны, дьиэ кэргэҥҥитигэр дьолу соргуну, сырдыгы, ырааһы.