Быйыл Улуу Кыайыы 80 сылын бүтүн Россия үрдүнэн бэлиэтиибит. Бу ытык бэлиэ сылы Саха сирин араас муннуктарыгар дьон-сэргэ киэн хабааннаахтык, өрө күүрүүлээхтик бэлиэтиирэ күүтүллэр.

Биир оннук бэлиэ түгэн бүгүн Күөрдэм нэһилиэгин дьонугар-сэргэтигэр тосхойдо. Ол курдук, Кыайыы Знамята бүтүн Республиканы кэрийэн, эстафета быһыытынан, Хачыкаат нэьилиэгиттэн баһылык Ирина Викторовна Оболкина, Чечня сэриитин кытыылааҕа Федоров Павел Иванович — 2-Дьөппөн баһылыгын эбээһинэһин толорооччутугар Ольга Аполлоновна Петуховаҕа туттардылар. Сэрии сылын оҕото, СР тыатын хаһаайыстыбатын, ветеринарнай сулууспатын, физическай культуратын ветерана, 2-Дьөппөн нэһилиэгин бочуоттаах олохтооҕо Николай Тихонович Скрябин тыл эттэ, кэпсээтэ. Р.К.Захаров аат. «Самыртай» МК «Саллаат суруга» диэн биир дойулаахтарбыт туһунан быыстапка турда.
Бырааттыы Николаевтар аат. 2-Дьөппөн орто оскуолатын «Модун» военно-патриотическай клуб Семен Семенович Поисеев салайааччылаах строевой хаамыыны көрдөрдүлэр. Ону сэргэ «Күөрдэм кэскилэ» хоһоонньуттар бөлөхтөрө салайааччы Анжелика Николаевна Лебедева — Тимофей Сметанин «Сирдээҕи дьолум» хоһоонунан түмүктээтилэр. Салҕыы Кыайыы Кыьыл Знамята Тит-Эбэ нэһилиэгэр айаннаата.
— Аҕа дойду Улуу сэриитин уот-хонуу толоонугар охтубут хорсун буойуннарбыт, дьоллоох олох оҥкулун оҥорсубут ветераннарбыт ааттара үйэлэр тухары умнуллубатын, көлүөнэттэн көлүөнэҕэ кэриэстэнэ турдун!