Кулун тутар 15 күнүгэр Нөмүгү Тииттээҕэр үгэс буолбут «Булчут күрэҕэ» буолан ааста. Уопсайа сэттэ хамаанда кыттыыны ылла. Быйыл аан бастакытын » Якутцемент» Мохсоҕоллоох хамаандата кытынна диэн тэрийээччилэр бэлиэтээтилэр. Нөмүгүттэн икки хамаанда, Покровскайтан, икки Дьөппөнтөн, Улахан Аантан аҕыстыы уолан эр бэртэрэ айылҕаҕа сылдьан моһоллору туорааһын түһүмэхтэринэн күрэхтэстилэр. Бастакы миэстэни Покровскай, иккиһи-үсүһү Нөмүгү икки хамаандата үллэһиннилэр. Уолаттар тоҥуу хаарынан сүүрэн быыппасталлара, тиритэ -хорута ойбон аллараллара, туут хайыһарынан чигдигэ уйдаран айанныыллара, уот оттон чэй өрүнэллэрэ — саха киһитин хараҕын манньытар көстүүтэ буоллаҕа. Итини барытын өбүгэбит тыыннаах, астаах-үөллээх, таҥнар таҥастаах сылдьар иһин баһылаабыт ньымата, үтүөкэн үгэһэ буолан билигин күрэх быһыытынан ыытыллара кэрэхсэбиллээх. Аны бу уолаттар Бултааһын-балыктааһын сокуонун билэр тургутугу эмиэ аастылар. Онон күрэх хайа да өттүнэн толору буолла. Эбиэккэ, тэрийээччилэр кулуһуҥҥа буспут эт, балык миининэн күрэхтэһээччилэри, ыалдьааччылары күндүлээтилэр. Күрэхтэһии буоларын тухары итии чэйи, собо миинин иһэ таарыйа сылаас буолакка киирэн иттэр усулуобуйа кытары толкуйдаммытын биһирээтим. Ол иннинээҕи күн саа арааһынан ытыы көрүҥэ анаммыт сиргэ, Дьокуускайга ыытыллыбыт эбит. Онон түмүккэ биһигиттэн , Күөрдэмтэн, Дмитрий Михайлов, Александр Алексеев, Аркадий Скрябин, Владимир Румянцев ытыыга туйгуннар ортолоругар сылдьаллар. Автоматы ыһыыга-хомуйууга Алексей Соловьев үһүстээтэ, ойбон алларыыга Иннокентий Прокопьев, Сэмэн Платонов бастаатылар. Түмүккэ төрдүс миэстэ буолан булчуттар үөрүүлэрэ үгүс. Ойбону алларыы абсолютнай күрэҕэр Иннокентий Прокопьев чемпион аатын ылан, хамаанда уруйун -айхалын кытта 5 000 уу харчынан биһирэннэ. Күөрдэм хамаандатын Кузьма Ефремов күрэх саҕаланыаҕыттан салайан сылдьар. Аны республика күрэҕэр улуустан сүүмэрдэммит хамаанда кыттара былааннанар. Сылтан сыл улуустааҕы күрэх тэрээһинэ тупсан иһэр. Тэрийээччилэргэ — Нөмүгү администрациятыгар- баһылык Наум Васильевич Устиновка, булчуттар Хаҥаластааҕы обществоларыгар, Хаҥаластааҕы айылҕа харыстабылын инспекциятыгар, ытыктыыр киһибит Александр Ильич Борисов уолугар Илья Александрович Борисовка

Күөрдэм кытааччыларын аатыттан махтал буоллун.

Саргылана Федорова, «Ситим» КК дириэктэрэ.