ДЬИЭ КЭРГЭН, ОҔО СААС сылларыгар анаммыт самаан сайыны хоһуйар хоһоон ааҕыытын күрэҕэ биллэриллибитэ. Хоһоону дьүүллүүр сүбэҕэ Галина Иванова- Айтыына Уран, СӨ суруйааччыларын сойууһун чилиэнэ,  Саргылана Федорова – Саргылана Сайын үлэлэстилэр. Хоһоон илгэлээх- уйгулаах сайыны хоһуйар, уус уран тылларынан суруллубут, сылаас эйгэлээх, сырдык тыыннаах буолуохтаах. Уус уран айымньы, төһө да кылгас кээмэйдэннэр, элбэҕи этэр, толкуйдатар, кэрэҕэ- сырдыкка угуйар алыптаах, тэтимнээх, абылыыр күүстээх. Онно сиэттэрэн хоһоону ааҕааччы истээччини тардар күүстээх, энергетикалаах, туспа ураты куоластаах, көстүүлээх буолар. Устар ууну сомоҕолуур уран тыллаах суруйааччыларбыт, уруккулар да, билиҥҥи кэм бэйиэттэрэ да буоллун, хайдахтаах кэрэтик ааҕалларый, дьоҥҥо сөбүлэтэллэрий?!Төһөлөөх энергияны биэрэллэрий, киһи истэ эрэ , сэргии  эрэ олоруох. Ол иһин кинилэргэ анаан көстүбэт обелискалар, ыллыга суох ытыктабыл бэлиэлэрэ баар буоллахтара.

Биһиги, дьону сэргии эрэ олорумуох, бэйэбит эмиэ ааҕыах, тэрийиэх диэн санааттан сайыны хоһуйар видеоааҕыы биллэрэн күрэх ыыттыбыт. Хомойуох иһин, күрэх балаһыанньатыгар эппиэттиир биир хоһоон кэллэ. Олоҥхо дойдута Сунтаартан Наталья Николаевна Никифорова айымнытын ааҕан ыытта. Хоһоонньут бу хоһоонун сайтпытыгар үллэстэбит. Көрүҥ, истиҥ, сэргээҥ, кэрэхсээҥ. Аныгы да күрэхтэрбитигэр кыттар буолаарыҥ диэн ыҥырабыт.

А.М. Сидорова аатынан «Ситим» КК