Тохсунньу 14 күнүгэр, Хаҥалас улууһун 2-с Дьөппөн нэһилиэгин делегацията Чурапчы улууһун Төлөй нэһилиэгэр ыалдьыттаан кэллэ. Ол курдук, делегация састаабыгар нэһилиэк быьылыга А.А.Варламов, тэрилтэ салайааччылара уонна Дьөппөн Дьокуускайдааҕы түмсүүтүн активистара, тумус туттар уолаттарбыт киирдилэр: Сусоев Александр Владимирович (Ил-Тумэн депутата), Скрябин Тихон Николаевич (ООО «СК-Профстрой» «СЭТТЭ» директорын солбуйааччыта), Скрябин Максим Дмитриевич (ООО «Максимус» тутуу хампаанньатын ген.директора). Ону сэргэ, «НВК «Саха» филиалларын улэтин сүрүннүүр сулууспа начальнига — Лебедев Александр Михайлович уонна Төлөйтөн төрүттээх «ЦентрДомСтрой» ген.директорын солбуйааччыта- Николаев Игорь Владимирович. Уопсайа, 20 киһилээх халыҥ хамаанда буолан айаннаатылар.
Күн бастакы аҥарыгар, былаан быһыытынан, Мугудай нэһилиэгэр тохтоон, «Устойчивое развитие сельских территорий» федеральнай целевой программанан хайдах улэлэһэ сылдьалларын билистилэр. 2015 сыл-ха саҥа арыллыбыт, 120 миэстэлээх, космофизик Д.Д..Красильников аат.Мугудай орто оскуолатыгар нэһилиэк баһылыга Пермяков Кузьма Иннокентьевич уонна оскуола директора Анатолий Алексеевич Федоров көрсөн, батыһыннара сылдьан кэпсээтилэр, көрдөрдүлэр. «Чараҥ» агрокластер үлэтин-хамнаһын, инники былааннарын билистилэр, эдэр фермердары үлэ миэстэтигэр көрсөн кэпсэттилэр. Улэһит дьонунан-сэргэтинэн, түмсүүтүнэн, кыахтаах улахан бырайыактарга ылсан, тыа хаһаайыстыбатын сайдыытыгар бүтүн республикаҕа бастын уопуту көрдөрбүт нэһилиэккэ ыалдьыттаан, астынан, күн иккис аҥарыгар Төлөй нэһилиэгэр айаннаатылар.
Аара суол тоҕойугар, халын үөр сылгы арыалдьыттаах, Төлөй нэһилиэгин баһылыга Аммосов Николай Иннокентьевич көрсөн, төлөйдөр киэн-туттар, маанылыыр сайылыктарын «Мээндийэни» көрдөрдө, кэлбит дьонно сахалыы лэппиэскэ тооромосторун биэртэлээн, сири-дойдуну аһатыҥ диэн эттэ-тыынна, үөрэн-көтөн, киэн туттан туран нэһилиэк историятын кэпсээн билиһиннэрдэ.
Сахабыт сирин биир кэрэ көстүүлээх, төрүт түөлбэ алааһыгар олохтоохтор хайдах курдук хаһаайынныы сыһыаннаһан, табыгастаахтык тэринэн сайылыктыылларын көрөн киһи эрэ астыныах, ымсыырыах.
Баһылык Николай Иннокентьевич олохтоох дьаһалта дьиэтигэр киллэрэн, солбуйааччыта Смирников Максим Викторовичтыын нэһилиэк уопсай үлэтин-хамнаһын кэпсээтилэр, салгыы Төлөй орто оскуолатыгар нэһилиэк тэрилтэлэрин салайааччыларын, общественниктарын кытта төгүрүк остуол тула кэпсэтиигэ ыҥырдылар.
Чурапчы улууһун Төлөй нэһилиэгэ уонна Хаҥалас улууһун 2-с Дьөппөн нэһилиэгэ быйыл, 2017 сылга 250 сылларын бэлиэтиир, республика үрдүнэн үбүлүөйдээх нэһилиэктэр буолаллар.
Төгүрүк остуолга саал толору буолан биэрдэ. Тэрилтэ салаайааччыларын таһынан, нэһилиэк кырдьаҕастара, араас түмсүү салайааччылара кэпсэтиигэ интэриэстээхтэрин биллэрэн, үгүһү ыйыттылар, икки өттүттэн үбүлүөйдээх сылга туох үлэ-хамнас бара турарын сиһилии ырыттылар, санаа атастастылар.
Киэһэлик, сахалыы-махалыы быр курдук эт миининэн, сахалыы саламаатынан, алаадьынан күндүлэнэн, минньигэс астаах остуол тула бары олорон күө-дьаа кэпсэтии салҕанна, кэскиллээх этиилэр этилиннилэр.
Төлөйдөр сылын аайы кэтэһэр тэрээһиннэринэн, сыл түмүгүнэн — «Сыл бастыҥнара» тэрээһин буолар. «Аартык» сынньалаҥ киинигэр саала тобус-толору дьон-сэргэ мустубут. Үрдүк үөрүү көтөллөнөн, хабыллар ытыс тыаһынан доҕуһуоллатан, үлэ араас хайысхаларынан бастыннары наҕараадалааһын ыытылынна.
Дьокуускай куораттан Төлөй нэһилиэгин Попечителлэрин Сэбиэтин тумус-тутаах дьонноро кэлэннэр, биир дойдулаахтарын эҕэрдэлээтилэр, нэһилиэк үбүлүөйүгэр көмө-тирэх буолуохпут диэн тоһоҕолоон бэлиэтээтилэр.
Үөрүүлээх киэһэ ыалдьыттар делегациялара бука бары сыанаҕа тахсан, Төлөй нэһилиэгин дьонун-сэргэтин Саҥа дьылынан эҕэрдэлээтилэр, үбүлүөйдээх сылга үгүс ситиһиини баҕаран туран, өйдөбүнньүк бэлэх туттардылар. Бу дьоро киэһэни саха эстрадатын ырыаһыттара Умсуура, Айгылаан, Сайсары Куо киэргэттилэр.
Ол кэннэ, олохтоох дьаһалта көҕүлээһининэн Саҥа дьыллааҕы лотерея оонньонно. Лотереяҕа үгүс сыаналаах мал-сал, мебель уонна сүрүн бириис быһыытынан мотоцикл турда. Ыалдьыттар эмиэ билиэт ыланнар, лотереяҕа кыттыстылар. Тынааһыннаах оонньонуу түмүгэр, 2-с Дьөппөн «Дьулуур» спортсаалатын сэбиэдиссэйэ Алексеев И.А. мотоцикл сүүйэн, соһуччу үөрүү тосхойдо.
Ити курдук, үөрүү-көтүү үктэллэнэн, истинник сэһэргэһэн, икки үбүлүөйдээх нэһилиэк салалтата инникитин даҕаны бииргэ улэлэһэргэ баҕа санааларын биллэрэн араҕыстылар.
2017 сыл- Төлөй уонна 2-с Дьөппөн нэһилиэктэригэр үгүс сыралаах, улахан эппиэтинэстээх сыл буолара саарбаҕа суох. Үбүлүөйдээх сылга, бу икки нэһилиэк үлэһит дьонугар–сэргэтигэр, салалтатыгар кыайыыны-хотууну, үрдүк ситиһиилэри баҕара хаалабыт!